Almatyda avtomobılderdiń úlken aǵynymen baılanysty problemany sheshý úshin qalaǵa kiretin magıstraldardyń sanyn kóbeıtý qajet. Bul týraly Almaty ákimi Erbolat Dosaev OKQ brıfıńinde jýrnalıserdiń suraqtaryna oraı bergen jaýabynda aıtty.
Búginde 2 kóshede – Rysqulov dańǵyly men Saın kóshelerin BAKAD-qa deıin tesý jumystary júrgizilip jatyr. Sonymen qatar BAKAD-qa aparatyn 3 radıaldy joldy tesý boıynsha JSQ ázirlenýde. Bul Abaı dańǵylynyń, Severnoe aınalma kóshesi jáne Tilendıev kóshesiniń ekinshi bóligi. Biz bul jumystardy 2027 jylǵa deıin kezeń-kezeńimen aıaqtaýdy josparlanyp otyr.
Shahar basshysynyń aıtýynsha, qoldanystaǵy qalaǵa kiretin iri magıstraldardyń ótkizý qabiletin arttyrý maqsatynda Qulja traktisin Rysqulov dańǵylynan Buqtyrma kóshesine deıin alty jolaqqa deıin keńeıtýge JSQ ázirleý bastaldy.
Qazirgi tańda qala ishindegi kólik júktemesin azaıtý úshin Tóle bı kóshesin (Iassaýı kóshesinen qala shekarasyna deıin) tesý jumystary júrgizilýde. 2024 jyly Qajymuqan kóshesin (Seıfýllın dańǵylynan Jamaqaev kóshesine deıin) jáne Jubanov kóshesin (Momyshuly kóshesinen qala shekarasyna deıin) tesý jumystaryn bastaý josparlanýda, Muqanov kóshesin (Raıymbek dańǵylynan Muqanov kóshesine deıin) tesýge JSQ ázirlenýde. Jumystardy 2027 jylǵa deıin aıaqtaý josparlanýda.
Shahar basshysy óziniń tapsyrmasy boıynsha jol qozǵalysyn basqarýdyń avtomattandyrylǵan júıesin engizý boıynsha jumystar júrgizilip jatqanyn habarlady. Buǵan qaladaǵy qalǵan 498 baǵdarsham da kiredi.
«2021 jyldyń qyrkúıeginde biz jańǵyrtýdyń birinshi kezeńi boıynsha jumystardy aıaqtadyq. Búginde 591 nysannyń 93-i avtomatty rejımde jumys isteıdi. Jalpy, jumystar 2025 jylǵa deıin tolyq aıaqtalady dep josparlanyp otyr. Avtomattandyrylǵan júıe kóshelerdiń ótkizý qabiletin arttyrýǵa múmkindik beredi», - dep túıindedi qala ákimi.