Almatynyń Almaly aýdanynda bıyl 12,5 km-den astam aryq júıesi salynady, dep habarlaıdy aqshamnews.kz
Almaty ákimi Erbolat Dosaev Almaly aýdany turǵyndarymen kezdesý barysynda jol ınfraqurylymyn jańartý jáne jolaýshylar tasymaly sapasyn arttyrý boıynsha atqarylyp jatqan jumystarǵa toqtaldy.
Qala basshysynyń málimdeýinshe, ótken jyly aýdanda 13,6 km bolatyn 15 kóshege ortasha jóndeý júrgizildi. Bıyl da osyndaı kólemde, ıaǵnı uzyndyǵy 11 km bolatyn 15 kóshe jóndelmek.
Buǵan qosa, 2024 jyly aýdan ákimdigi aǵymdaǵy jóndeý jumystary aıasynda 47 myń sharshy metr jol jabynyn qalpyna keltirip, 8,9 km aryq júıesin saldy. 2025 jyly taǵy 25 myń sharshy metr joldy jóndeý jáne 12,5 km aryq júıesin salý josparlanǵan.
«Turǵyndarǵa qyzmet kórsetý sapasyn jaqsartý maqsatynda ákimdik qoǵamdyq kólik parkin únemi jańartyp otyrady. 2024 jyly Almaly aýdanynda avtobýstar sany 401-den 523-ke deıin kóbeıdi. Bul tórt jańa marshrýt ashýǵa jáne 43 marshrýtqa qosymsha avtobýstar shyǵarýǵa múmkindik berdi», – dedi Erbolat Dosaev.
Onyń aıtýynsha, qoǵamdyq kóliktiń qoljetimdiligin arttyrý jáne damytý maqsatynda bıyl qala boıynsha taǵy 800 jańa avtobýs satyp alynyp, qala aýdandaryna bólinedi.