Almaty ákimi Erbolat Dosaev Almaly aýdany turǵyndarymen kezdesý barysynda elektrmen jabdyqtaý sapasyn arttyrýǵa qatysty jospardy aıtty.
Onyń aıtýynsha, 2025 jyly aýdannyń jaryqtandyrý deńgeıin 100%-ǵa jetkizý josparlanyp otyr. Turǵyndardy turaqty elektr qýatymen qamtamasyz etý maqsatynda 2024 jyly Raıymbek – Naýryzbaı batyr – Mámetova – Seıfýllın (1,3 km) kósheleri men Jambyl – Áýezov – Abaı – Rozybakıev (6,4 km) kósheleri aýmaǵynda 7,7 km elektr jelisi jańartyldy. Sonymen qatar, 58,1 km eski kabel jelisi jańǵyrtylyp, 4,4 myńnan astam sham aýystyryldy jáne 193 jaryq baǵanasy ornatyldy. Jalpy, 46 kóshe men 185 aýla qamtyldy.
Qala basshysy bıyl da jelilerdi jańǵyrtý jalǵasatynyn atap ótti. Jospar boıynsha 27,1 km elektr jelisi jańartylyp, 85 transformatorlyq qosalqy stansıa jóndelip, 1 jańa stansıa salynbaq. Sondaı-aq 4,5 myń sham jańartylyp, 58 km kabel jelisi aýystyrylyp, 483 jaryq baǵanasy ornatylady.
Erbolat Dosaevtyń aıtýynsha, 2022 jyly bastalǵan elektr jelilerin jańǵyrtý boıynsha júıeli jumys qazirdiń jemisin berdi. Almaly aýdanyndaǵy elektr jelileriniń tozý deńgeıi 80%-dan 61%-ǵa deıin tómendedi.