Almaly aýdanyndaǵy ınjenerlik jelilerdiń damýy men jaqsarýyna baǵyttalǵan mańyzdy jumystar 2024 jyly bastalyp, úlken jetistikterge jetti. Osy baǵytta aýdan turǵyndaryn turaqty sýmen jáne káriz júıelerimen qamtamasyz etý maqsatynda aıtarlyqtaı jumystar atqarylǵany jaıynda Almaly aýdanynyń turǵyndarymen kezdesýinde qala ákimi Erbolat Dosaev aıtty, dep habarlaıdy aqshamnews.kz
- 2024 jyly Almaly aýdanynyń 21 kóshesinde 8,8 km ınjenerlik jeli salyndy. Bul jumystardyń jalpy quny 1,1 mlrd teńgeni qurady. Bul jeliler aýdan turǵyndaryn sapaly sýmen jáne káriz júıelerimen turaqty túrde qamtamasyz etýge múmkindik berdi. Sonymen qatar, 2024 jyldyń qarasha aıynda Tóle bı kóshesindegi sorǵy stansıasynyń rekonstrýksıasy aıaqtaldy. Qazirgi tańda stansıa 4 kópqabatty turǵyn úıdiń 1 500 abonentine turaqty sýmen jabdyqtaýdy qamtamasyz etedi.
2025 jyldyń sońyna deıin Almaly aýdanynda taǵy 23 kóshede 13,8 km ınjenerlik jeli salynýy josparlanǵan. Bul maqsattarǵa arnalǵan qarjy 6,2 mlrd teńgeni quraıdy. Bul jumystar aýdannyń ınfraqurylymyn odan ári damytýǵa, turǵyndardyń ómir súrý sapasyn arttyrýǵa múmkindik beredi, - dedi megopolıs basshysy E.Dosaev
Ótken jyly ınjenerlik jelilerdiń taǵy bir mańyzdy salasy – jylý júıeleriniń rekonstrýksıasy boıynsha aýqymdy jumystar júrgizildi. Jylý jelilerin modernızasıalaý jumystaryna jalpy somasy 1,5 mlrd teńge bólindi. Nátıjesinde 2,7 km jylý jelisi jańartylyp, osy jumystardyń arqasynda jylytý júıesi aıtarlyqtaı jaqsardy.
2025 jyldyń mamyr aıynda jylytý maýsymy aıaqtalǵannan keıin, taǵy 12,2 km jylýmen jabdyqtaý jelilerin rekonstrýksıalaý boıynsha 30 jobanyń iske asyrylýy bastalady. Bul jobalardyń jalpy quny 6,4 mlrd teńgeni quraıdy. Jobalardyń tolyq aıaqtalý merzimi 2025 jyldyń kúz aıyna josparlanǵan. Bul jumystar jylytý júıeleriniń tıimdiligin arttyryp, qala turǵyndarynyń jylytý maýsymynda turaqty jáne sapaly qyzmet alýyn qamtamasyz etedi.
Injenerlik jelilerdi modernızasıalaý jumystaryn jalǵastyrý, ásirese sý, káriz jáne jylý júıelerin jańartý, Almaly aýdanyndaǵy turǵyndardyń ómir súrý sapasyn jaqsartý úshin mańyzdy qadam bolyp tabylady. Bul jobalar aýdannyń ınfraqurylymyn nyǵaıtyp, bolashaqta áleýmettik jáne ekonomıkalyq damýdyń negizin qalaýǵa múmkindik beredi.