Bul týraly qalanyń úsh jyldyq búdjeti bekitilgen máslıhattyń kezekten tys sesıasynda belgili boldy. Atalǵan qarajat qala turǵyndarynyń ómir súrý sapasyn jaqsartýǵa jáne jaıly qalalyq ortany damytýǵa baǵyttalady.
Negizgi baǵyttardyń qatarynda qalany kógaldandyrý, qatty turmystyq qaldyqtardy jınaý ınfraqurylymyn jaqsartý jáne tabıǵı nysandardy kóriktendirý bar.
Qalany kógaldandyrý jobasy aǵashtar men butalardy otyrǵyzýdy, sondaı-aq saıabaqtar men jasyl aımaqtardy kóriktendirýdi qamtıdy. Bıyl Almatyda búdjet qarajaty esebinen 170 myń kóshet otyrǵyzý josparlanǵan, onyń 110 myńnan astamy kúzgi maýsymda otyrǵyzyldy. Bul árbir turǵynǵa jasyl jelek aýmaǵyn 12,5 sharshy metrden 12,8 sharshy metrge deıin arttyrýǵa múmkindik beredi.
Sonymen qatar, 2025 jyly qatty turmystyq qaldyqtardy jınaý júıesin jańartý jumystary jalǵasady. Qalada 2 myńnan astam tereńdetile kómilgen konteıner ornatý josparlanǵan, bul qalanyń sanıtarlyq jaǵdaıyn jaqsartýǵa septigin tıgizedi. Sondaı-aq İle aýdanynda qatty turmystyq qaldyqtardy kómýge arnalǵan jańa polıgon jobasy ázirlenýde, bul bolashaqta qaldyqtardy kádege jaratý máselesin tıimdi sheshýge septigin tıgizedi.
Úlken Almaty jáne Qarǵaly ózenderiniń arnasyn qaıta qurý, sondaı-aq «Saıran» sý qoımasyn kóriktendirý jobalary tabıǵı ekojúıelerdi qalpyna keltirýge jáne turǵyndarǵa arnalǵan jańa ekologıalyq taza demalys aımaqtaryn qurýǵa baǵyttalǵan.