Sebebi, elde týý kórsetkishi tómendep ketken.
Tokıo bıligi qatty tómendep ketken týý kórsetkishin kóterý maqsatynda memleket qyzmetkerleriniń bárine tórt kúndik jumys aptasyn engizedi, dep habarlaıdy aqshamnews.kz CNN telearnasyna silteme jasap.
Qala ákimdiginiń aqparatyna saı, qyzmetkerlerge aptasyna úsh kún demalýǵa múmkindik beretin ózgeris sáýirde kúshine enedi. Buǵan qosa bastaýysh synypta oqıtyn balasy bar ata-analarǵa jumystan erterek bosaýǵa ruqsat beretin taǵy bir ózgeris jarıalandy.
"Biz jumys isteý tártibin qaıta qaraımyz. Endi eshkim bala týý nemese bala kútimi sekildi úıdegi máselelerge baılanysty jumystaǵy mansabynan bas tartpaıtyn bolady", - dep málimdedi Tokıo gýbernatory Iýrıko Koıke.
Japonıada týý kórsetkishi kóptegen jyldar boıy tómendep ketken. Úkimettiń jastarǵa otbasyn qurýǵa jaǵdaı jasap jatqanyna qaramastan, týý kórsetkishi jaqsarar emes. Byltyr osy elde bar bolǵany 727 277 bala dúnıege kelgen. Japonıada áıelderdiń ortasha bala sanyna qatysty kórsetkishi 1,2 ǵana bolǵan. Halyq sanyn turaqty túrde ustap turý úshin mundaı kórsetkish kem degende 2,1 bolýy kerek. Japonıa úkimeti demografıalyq daǵdarysty eńserý maqsatynda túrli baǵdarlamalar engizip jatyr. Bul elde er azamattar bala kútý úshin aqyly demalysqa shyǵa alady. Áleýmettanýshylardyń kóbi týý deńgeıiniń tómendeýin Japonıadaǵy eńbek mádenıeti men ómir súrý qunynyń qymbattaýymen túsindiredi.