Ekonomıkanyń ósimin qamtamasyz etý jáne ınvestısıalyq tartymdylyǵyn arttyrý turǵysynan alǵanda kásiptik bilim berý salasyna reforma jasaý – búginde aıryqsha ózekti másele.
Parlament palatalarynyń birlesken otyrysynda Qazaqstan halqyna Joldaý jasaǵan Prezıdent Qasym-Jomart Toqaev aldaǵy jyldy Jumysshy mamandyqtary jyly dep jarıalady, sondaı-aq tehnıkalyq jáne kásibı bilim berý júıesin reformalaý qajettigine nazar aýdartty. «Biz jumysshy mamandyqtaryn dáripteý arqyly qoǵamda eńbekqor jáne naǵyz maman bolý ıdeıasyn nasıhattaımyz» dedi Memleket basshysy.
Prezıdent adal ári tabandy eńbegimen tabysqa jetken adamdar qashanda qurmetti, syıly bolýy kerek ekendigin aıtty. Bul «Adal azamat – Adal eńbek – Adal tabys» qaǵıdatyna tolyq saı keledi. Qasym-Jomart Toqaev bizdiń qoǵamda eńbekqorlyq, kásibılik sıaqty qasıetter óte joǵary baǵalanýǵa tıis, óz kásibin jetik meńgergen mamandar ult sapasyn arttyrady dep esepteıdi.
«Jumystyń jamany joq, kez kelgen eńbek – qadirli. Eń bastysy, árkim jaýapkershilikti tereń sezinip, óz mindetin sapaly atqarýǵa tıis. Sonda ǵana elimiz damýdyń sara jolyna túsedi. Halqymyzda «Jumystyń kózin tapqan baılyqtyń ózin tabady» degen sóz bar. Kásibine adal ári jaýapkershilikpen qaraǵan adam qashanda laıyqty baǵasyn alady. Bul túsinikti qoǵam sanasyna sińirý qajet. Azamattarǵa qurmetti ataq berýdegi túpki maqsatymyz da – osy. Buǵan deıin muǵalimderge, dárigerlerge jáne mádenıet qaıratkerlerine osyndaı ataqtar berile bastady. Bul – óte jaqsy bastama, onyń aıasyn keńeıtý kerek», - dedi Prezıdent.
Memleket basshysy ekonomıkany bilikti mamandarmen qamtamasyz etý asa ózekti mindet dep sanaıdy. Bul rette ol eń aldymen, sý, energetıka, qurylys jáne basqa da salalarda qatty baıqalyp otyrǵan kadr tapshylyǵyn joıý qajettigin atap ótti. Sondaı-aq bolashaqta suranysqa ıe bolatyn kásipter úshin bilikti mamandar daıarlaý kerek. Bul baǵytta naqty jumystar bastalǵany da málim.
«Úkimet joǵary bilim salasyn halyqaralyq bilim berý keńistigimen yqpaldastyryp jatyr. Qazirdiń ózinde elimizde sheteldiń belgili 23 joǵary oqý orny jumys júrgize bastady. Olarǵa meılinshe qoldaý kórsetý kerek. Atap aıtqanda, maman daıarlaýǵa beriletin memlekettik tapsyrysty birtindep kóbeıtken jón. Bul tásildi bilim baǵdarlamasy zaman talabyna saı keletin óz oqý oryndarymyzǵa da qoldanýǵa bolady. Osy rette grant quny jastardy sapaly oqytýǵa múmkindik berýge tıis. Memleket qarjysyn ýnıversıtettiń bárine shashyratyp, ońdy-soldy tarata berýge bolmaıdy», - dedi Prezıdent.
Memleket basshysy sondaı-aq úzdik ýnıversıtetterdiń naqty sektormen baılanysyn nyǵaıtý, ınovasıalyq saıasatty elimizdiń ǵylymı-tehnologıalyq basymdyqtarymen úılestirý máselesine toqtaldy. Sebebi bul ár saladaǵy ınovasıaǵa serpin beredi. Sondaı-aq joǵary oqý oryndaryndaǵy qoldanbaly ǵylymnyń áleýetin arttyrady. Sonymen qatar ǵalymdardyń sheteldegi taǵylymdamasyn ánsheıin sınekýraǵa jáne «akademıalyq týrızmge» aınaldyrmaý kerektigi de tilge tıek boldy. Prezıdent sondaı-aq joǵary oqý oryndary ǵana emes, tehnıkalyq jáne kásiptik bilim berý mekemeleri de bilikti kadrlar daıarlaýy qajettigin eskerte kele, Úkimet kolejde jaqsy oqyǵan túlekterdi mamandyǵy boıynsha memlekettik qyzmetke alý múmkindigin qarastyrýǵa tıis ekendigin aıtty.