Qara altyn óndirý jospary – 90,5 mln tonna.
Keler jyly Qazaqstanda munaı óndirisiniń kólemi arta túsedi dep josparlanyp otyr, dep habarlaıdy Almaty-akshamy.kz QazAqparatqa silteme jasap.
«Bıylǵy jyl qorytyndysy boıynsha munaı óndirý kólemi – 84 mln tonna. Bul – ótken jyldyń kórsetkishimen salystyrǵanda 96,5%. Munaı óndirýdiń tómendeýi Qashaǵan ken ornyndaǵy «Bolashaq» zaýytyndaǵy jospardan tys jóndeý jumystaryna, Qarashyǵanaqtan gaz jetkiziletin Orynbor gaz óńdeý zaýytynyń toqtaýyna, sondaı-aq Kaspıı qubyr konsorsıýmyndaǵy jóndeý jumystaryna baılanysty boldy. Olar 64,8 mln tonna deńgeıindegi munaı eksportyna teris áser etti, ótken jylǵy deńgeıden 4,1%-ǵa tómen», - dedi Energetıka mınıstri Bolat Aqsholaqov Ortalyq komýnıkasıalar qyzmeti alańynda ótken baspasóz máslıhatynda.
Mınıstr keltirgen málimet boıynsha, 2023 jylǵa arnalǵan munaı óndirý jospary – 90,5 mln tonna, al eksport kólemi – 71 mln tonna.
«Munaı óndirý salasynda iri jobalardy iske asyrý boıynsha elimizdiń 3 negizgi ken ornynda jumys jalǵasady. Teńiz ken ornynda munaı óndirýdi jylyna 12 mln tonnaǵa ulǵaıtýǵa múmkindik beretin joba iske asyrylyp jatyr. Bıyl joba boıynsha jumystyń jalpy ilgerileýi – 95,2%. Jobany 2024 jyly aıaqtaý josparlanyp otyr. 2023 jyly Teńizde uńǵyma erneýiniń qysymyn basqarý jobasy aıaqtalady. Ol keleshekte ken ornynda jumys isteıtin zaýyttardyń óńdeý qýattarynyń tolyq júktelýin qamtamasyz etedi», - deıdi mınıstr.