2023 jylǵa deıin polısıa qyzmetkerleriniń jalaqysy 90 paıyzǵa deıin ósedi. Bul týraly Májilistegi Úkimet saǵatynda QR İshki ister mınıstri Erlan Turǵymbaev aıtty, dep habarlaıdy almaty-akshamy.kz
«Qyzmetkerlerdiń áleýmettik-materıaldyq jaǵdaıyn kóterý boıynsha is-sharalar qabyldanýda. Búginde polısıa qyzmetkerleriniń jalaqysy quqyq qorǵaý organdary arasynda óte tómen. Sondyqtan Memleket basshysynyń tapsyrmasyna sáıkes, 2019 jyldan bastap kezeń-kezeńmen jalaqy kóterilýde», - dedi mınıstr.
Onyń atap ótýinshe, 2023 jylǵa deıin polısıa qyzmetkerleriniń jalaqysyn 50-den 90 paıyzǵa deıin ósirý kózdelgen.
«Osylaısha, serjanttyń jalaqysy 81 myńnan 140 myń teńgege deıin, leıtenant jalaqysy 103 myńnan 174 myń teńgege deıin artady», - dedi Erlan Turǵymbaev.