Óńirlik komýnıkasıalar qyzmetiniń baspasóz konferensıasy barysynda Almaty qalasy Áleýmettik medısınalyq saqtandyrý qory fılıalynyń dırektory Tileýhan Ábildaev 2022 jyldyń basyndaǵy jáne ótken jylǵy MÁMS júıesindegi jaǵdaı týraly aıtyp berdi, dep habarlaıdy Almaty-akshamy.kz
Mindetti áleýmettik medısınalyq saqtandyrý aıasynda 2022 jyly 187 medısınalyq uıymmen (onyń 80-i memlekettik) jalpy somasy 213,2 mlrd teńgege shart jasalǵany belgili boldy, onyń ishinde: tegin medısınalyq kómektiń kepildik berilgen kólemi (TMKKK) sheńberinde 117,7 mlrd teńge jáne MÁMS júıesinde – 95,4 mlrd teńge. Aǵymdaǵy jyly barlyǵy 12 medısınalyq uıym qosyldy.
Tileýhan Ábildaev atap ótkendeı, Ulttyq ekonomıka mınıstrliginiń derekterine silteme jasaı otyryp, Almaty qalasynyń 2 024 989 turǵynynyń ishinde saqtandyrylǵan halyqtyń sany (2022 jylǵy 1 aqpandaǵy jaǵdaı boıynsha) 81,1%-dy qurady. Saqtandyrylmaǵandardyń sany 382 940 adamdy nemese 18,9% quraıdy.
Spıker saqtandyrylǵan turǵyndarǵa MÁMS áleýetiniń arqasynda barlyq josparly, qymbat konsýltasıalyq-dıagnostıkalyq qyzmetterdiń qoljetimdi ekenin eske saldy.
T. Ábildaev 2021 jylǵy jumys nátıjeleri týraly da aıtyp berdi, ótken jyly medısınalyq saqtandyrý qorynan saqtandyrylǵan almatylyqtardyń medısınalyq kómegin tóleýge shamamen 93 mlrd teńge jumsaldy.
«Barlyq josparly medısınalyq kómek MÁMS júıesi esebinen óteledi. Ótken jyly shyǵyndardyń basym bóligi stasıonarlyq medısınalyq kómekti tóleýge jumsaldy – 48,6 mlrd teńgeden astam, taǵy 3,9 mlrd teńge kúndizgi stasıonar qyzmetterin tóleýge baǵyttaldy», - dedi T. Ábildaev.
ÁMSQ Almaty fılıalynyń dırektory 2021 jyldyń qorytyndysy boıynsha júrgizilgen qymbat turatyn taldaýlar, dıagnostıka jáne operasıalar sany aıtarlyqtaı óskenin, MÁMS engizilgenge deıin halyqtyń olarǵa qoljetkize almaǵanyn, endi medısınalyq saqtandyrý esebinen qoljetimdi ekenin aıtty.
Máselen, ótken jyly konsýltasıalyq-dıagnostıkalyq kómek kórsetkeni úshin medısınalyq uıymdarǵa 14,5 mlrd teńge tólendi. Olardyń ishinde eń kóp suranysqa ıe KT jáne MRT. Jyl ishinde Almaty qalasy boıynsha 848,1 mln teńgege KT-nyń 70 myńnan astam qyzmeti, shamamen 681,8 mln teńgege MRT-nyń 50 myńnan astam qyzmeti jáne 1,5 mlrd teńgeden astam somaǵa pozıtrondy-emıssıalyq tomografıanyń 6 myńnan astam qyzmeti kórsetildi.
MÁMS júıesinde kórsetilgen qyzmetter arasynda ońaltý jeke mańyzǵa ıe. Ońaltý kómegine 6,2 mlrd teńge baǵyttaldy, onyń ishinde postkovıdti ońaltýǵa 222,4 mln teńge.