Elimizdiń 3 oblysynyń keı aýdandarynda pılottyq joba bastalyp ketti.
Bul týraly Densaýlyq saqtaý mınıstri Ajar Ǵınıat málimdedi, dep habarlaıdy Almaty-akshamy.kz.
Qazaqstannyń barlyq aýylynda 20 qazannan bastap profılaktıkalyq tekseris júrgiziledi.
Mınıstr koronavırýs pandemıasy kezinde shekteý sharalaryna baılanysty aýyl turǵyndaryna mamandandyrylǵan medısınalyq kómektiń qoljetimdiligi tómendegenin atap ótti.
«Soǵan baılanysty aýrýlardy erte anyqtaý jáne ýaqtyly emdeý úshin aýqymdy profılaktıkalyq qarap-tekserýler engizilýde. Biz tek profılaktıkalyq tekseris júrgizip qana qoımaı, árbir azamattyń densaýlyǵyn baqylap otyramyz. 20 qazannan bastap aýyldarda profılaktıkalyq medısınalyq tekserister búkil el boıynsha júrgiziledi», - dedi A.Ǵınıat Májilistegi Úkimet saǵatynda.
Aıtýynsha, Qaraǵandy oblysynyń Abaı aýdanynda, Aqmola oblysynyń Arshaly aýdanynda jáne Almaty oblysynyń Eńbekshiqazaq aýdanynda pılottyq joba bastalyp ketti.
Jynystyq, jas quramyn, halyqtyń densaýlyǵyn taldaýdy eskere otyryp, nysanaly top pen aýyl turǵyndaryn skrınıngteý qyzmetteriniń tizbesi keńeıtildi.
Atap aıtqanda, 18 jasqa deıin – «Balalar», 18 jastan 29 jasqa deıin –«Jastar», 30 jastan 44 jasqa deıin – «Eńbek-1», 45 jastan 65 jasqa deıin – «Eńbek-2», 66 jastan asqandar – «Zeınetker» sanattary.
«Profılaktıkalyq qarap-tekserýler júrek-qan-tamyrlar júıesi aýrýlarynyń, qant dıabetiniń, asqazan men búırektiń sozylmaly aýrýlarynyń erte kezeńderin anyqtaýǵa baǵyttalǵan», - dedi mınıstr.
18 jasqa deıingi balalar úshin 1 jas, 3 jas, 6 jas jáne 14 jas aralyǵyndaǵy zerthanalyq zertteýlerdiń qosymsha jalpy klınıkalyq ádisteri engizildi.
Qalalyq jáne aýyldyq pasıentterdi ambýlatorıalyq deńgeıde teń dárejede tegin qamtamasyz etý úshin mynadaı jaǵdaılar jasalǵan:
- dárilik zattar ambýlatorıalyq dári-dármekpen qamtamasyz etýdiń biryńǵaı tizbesi boıynsha beriledi;
- aýylda dáriger bolmaǵan jaǵdaıda, feldsher tegin resept jazyp berýge quqyly;
- dárihana joq aýyldarda dárilik zattardy medısına qyzmetkeri medısınalyq-sanıtarlyq alǵashqy kómek obektileri arqyly, sondaı-aq jyljymaly dárihana pýnkteri arqyly tegin jiberedi.