Qazaqstan kınosynshylar qaýymdastyǵy Almatyda ótip jatqan VII Halyqaralyq «Baıqońyr» kınofestıvali sheńberinde «Synshylar tańdaýy» kınojúldesiniń jeńimpazdaryn jarıalady, dep habarlaıdy Almaty-akshamy.kz Inform.kz-ke silteme jasap.
Pandemıa saldarynan bul kınojúlde sońǵy ret 2020 jyly ótkizilgen. Uıymdastyrýshylar keıingi eki jylda jaryqqa shyqqan 40-tan astam týyndynyń ishinen úzdikterin anyqtady. Nátıjesinde, 4 birdeı nomınasıada usynylǵan Farhat Sharıpovtyń «18 kılogers» kórkem fılmi «Úzdik fılm» júldesimen marapattaldy. Júldeni kınosynshylar qaýymdastyǵynyń prezıdenti Gúlnar Ábikeeva tabystady.
«Shetelde alǵan birneshe júldemiz bar, alaıda týǵan jerde osyndaı marapatqa ıe bolǵanymyzǵa óte qýanyshtymyz», - dedi marapattaý rásiminde fılmniń prodúseri Dına Jumabek.
Aıta ketsek, «18 kılogers» fılmi alǵash ret halyqaralyq Varshava kınofestıvali sheńberinde kórsetilip, qazaq kınosynyń tarıhynda tuńǵysh ret atalǵan festıváldiń bas júldesin jeńip alǵan bolatyn. Sondaı-aq, Zara Esenamannyń «Hardkor» povesiniń jelisimen túsirilgen bul fılm Germanıada ótken 30-shy halyqaralyq Kotbýs kınofestıvalinde «Úzdik fılm» júldesimen marapattalyp, Qazan qalasynda ótken halyqaralyq musylman kınosynyń festıvalinde bas júldege qol jetkizgen.
«Synshylar tańdaýy» kınojúldesiniń kezekti jeńimpazy – «Janym, aıtsam senbeısiń» fılmi. Bul keshte atalǵan kınotýyndy «Úzdik janrlyq fılm» júldesimen marapattaldy. Sondaı-aq, bul fılm «Úzdik qoıýshy sýretshi» (Álıa Odınaeva), «Ekinshi plandaǵy úzdik er adam beınesi» (Dýlyǵa Aqmolda), «Úzdik án» («Irına Kaıratovna» feat. Hiro, De Lacure & Fatbelly – Koke) nomınasıalarynda jeńiske jetti.
«Atbaıdyń shaıqasy» fılmi úsh birdeı júldemen marapattaldy – «Úzdik rejıser» (Ádilhan Erjanov), «Úzdik akter» (Danıar Alshynov), «Ekinshi plandaǵy úzdik áıel beınesi» (Dınara Baqtybaeva).
Qazaqstan men Japonıa birlesip túsirgen «Barymtashylar» fılmi «Úzdik senarı» (Erlan Nurmuhambetov jáne Lıza Takeba) jáne «Úzdik qoıýshy operator» (Ázız Jambakıev) júldelermen marapattaldy.
Aktrısa jáne prodúser Ásel Sadýaqasova «Ulbolsyn» fılminde somdaǵan róli úshin «Úzdik áıel beınesi» júldesimen, al ıtalándyq kompozıtor Sandro dı Stefano «Ońbaǵandar» atty tragıkomedıasy úshin «Úzdik án» júldesimen marapattaldy.
«Synshylar tańdaýy» kınojúldesinde bes birdeı nomınasıada usynylǵan Álisher Jádigerovtyń «Otaý» fılmi «Úzdik debút» nomınasıasynda jeńiske jetti.
Sondaı-aq, Qazaqastan kınosynshylar qaýymdastyǵy qazaq derekti kınosynyń damýyna qosqan úlesi úshin Qanat Beısekeevke jáne qazaq onlaın-serıaldarynyń damýyna qosqan úlesi úshin Anar Júnisova men Qýat Sadyqovqa arnaıy júldelerdi tabystady.
Esterińizge sala ketsek, Qazaqstan kınosynshylar qaýymdastyǵy óz jumysyn 2015 jyldan beri atqaryp keledi. Búgingi tańda qaýymdastyqtyń músheligine 15 kásibı synshy men kınotanýshy qabyldanǵan.