Ulybrıtanıa úkimeti 16 jasqa tolmaǵan balalarǵa áleýmettik jelilerdi paıdalanýǵa tyıym salýy múmkin.
Bılik osylaısha jas jetkinshekterdi ǵalamtordaǵy zıandy kontentten qorǵaǵysy keledi. Úkimet buǵan deıin ınternettegi qaýipsizdik týraly zań qabyldap, ony buzǵan kompanıalarǵa iri kólemde aıyppul salýdy uıǵarǵany belgili. Balalarǵa zıandy kontent kórsetkeni úshin platformalar tabysynyń 10 paıyzyn tóleýge mindetteldi. Biraq bul azdyq etedi dep sheshken bılik endi 16 jasqa tolmaǵandarǵa áleýmettik jelilerdi paıdalanýǵa shekteý qoımaq, dep habarlaıdy almaty-akshamy.kz 24.kz-ke silteme jasap.
Endrú Grıffıt, Ulybrıtanıanyń ǵylym mınıstri: - Qazir osy másele boıynsha aqyldasyp jatyrmyz. Bolashaqta balalar áleýmettik jelilerdi paıdalanbas buryn ata-anasynyń ruqsaty suralatyn bolady.
Instagram men Pınterest jelilerinen zıandy kontent kórip, óz-ózine qol salǵan 14 jasar Mollı Rasseldiń otbasy qaıyrymdylyq qoryn ashqan bolatyn. Qor qyzmetkerleriniń pikirinshe, tele-radıo efıri men ınternettegi aqparatty qadaǵalaýmen aınalysatyn Ofkom agenttigine qosymsha ókilettikter berilý kerek.
Bıbon Kıdron, qoǵam belsendisi: - Áleýmettik jeliler táýeldilik týǵyzyp, shyndyqqa janaspaıtyn jasandy álemge jeteleıdi. Ol jasóspirimder otyratyn oryn emes. Sondyqtan retteýshi organnyń qyzmetin kúsheıtý kerek.
Internettegi qaýipsizdik týraly zań qoǵamda áli qyzý talqylanyp jatyr. Mańyzdy qujat balalardy qorǵaǵanymen azamattardyń jeke ómirine qol suǵady deıdi sarapshylar. Ásirese, hat almasqan kezde qupıalylyq saqtalmaıdy-mys. Iaǵnı, Vatsap, Vaıber paıdalanýshylar bir-birine qaýipti kontent jibermeýi úshin jazbalary qadaǵalanatyn bolady.
Kır Nýtı, Aqparattyq ınovasıalar ortalyǵynyń aǵa sarapshysy: - Shıfrlaý – ol aqparatty qupıa kodqa túrlendirý ádisi. Eki adam hat almasyp jatqanda, tipti, onlaın servıs te olardyń áńgimesinen beıhabar bolady. Bul sóz bostandyǵy men jeke bas qupıalyǵy úshin kerek dúnıe. Al jańa zańǵa sáıkes messendjerler kontentti qadaǵalap, jurttyń áńgimesin ańdyp otyrmaq.
Qaıyrymdylyq uıymdary men belsendiler 2017 jyldan beri ǵalamtordaǵy qaýipti kontentpen qatań kúres júrgizýge shaqyryp keledi. Arnaıy zań ótken kúzde qabyldanbas buryn óte uzaq tekserýden ótken bolatyn. Balalardy qorǵaýǵa arnalǵan qaıyrymdylyq uıymynyń pikirinshe, sońǵy 6 jyl ishinde ǵalamtorda balalar ómirine qaýip tóndirgen 35 myńǵa jýyq qylmys tirkelgen.