QR Oqý-aǵartý mınıstrligi Balalardyń quqyqtaryn qorǵaý komıteti 2024 jyly ótkizgen tekseristiń qorytyndysyn shyǵardy.
Barlyǵy 18 óńirde 342 uıym tekserildi, onyń ishinde 120-sy jergilikti jerde jáne 58-i jospardan tys baqylaý aıasynda tekserildi, dep habarlaıdy aqshamnews.kz.
Tekserýler orta bilim berý, densaýlyq saqtaý, áleýmettik qorǵaý mekemelerin, sonyń ishinde jetim balalar men ata-anasynyń qamqorlyǵynsyz qalǵan balalarǵa arnalǵan uıymdardy, sondaı-aq erekshe bilim berý qajettilikteri bar balalarǵa arnalǵan mamandandyrylǵan mekemelerdi qamtydy.
Anyqtalǵan zań buzýshylyqtar nátıjesinde 24 ákimshilik hattama toltyrylyp, 2 mıllıon teńgeden astam aıyppul salyndy, 133 uıǵarym shyǵarylyp, olardy joıý boıynsha 164 usynym joldandy. Budan bólek, 78 laýazymdy tulǵa tártiptik jaýapkershilikke tartyldy.
«Tekserýler jergilikti atqarýshy organdar tarapynan balalardyń quqyqtaryn qorǵaý salasynda zań buzýshylyqtardyń bar ekenin kórsetti. Bul zańnamanyń saqtalýyn baqylaýdy kúsheıtýdiń jáne olardyń bilim alýy men tárbıelenýi úshin qaýipsiz orta qalyptastyrýdyń mańyzdylyǵyn aıǵaqtaıdy. Júıeniń barlyq qatysýshylary balalardyń quqyqtary men ál-aýqaty úshin jaýapty, al olardyń basty mindeti – árbir balany qorǵaý, qoldaý jáne olarǵa teń múmkindikterdi qamtamasyz etý», – dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Qabyldanǵan sharalardyń nátıjesinde QR Oqý-aǵartý mınıstrligi 1500-den astam balanyń kelesi quqyqtaryn qalpyna keltirýdi qamtamasyz etti:
• Turǵyn úı quqyǵy – jetim balalar men ata-anasynyń qamqorlyǵynsyz qalǵan balalar úshin turǵyn úıge menshik nemese paıdalaný quqyǵyn saqtaý.
• Múliktik quqyqtar – kámeletke tolmaǵandardyń aktıvteri men zańdy múddelerin qorǵaý.
• Otbasynda ómir súrý jáne tárbıelený quqyǵy – balalardyń múddelerin shekteıtin zańsyz sheshimderdiń aldyn alý.
• Bilim alý quqyǵy – tıisti deńgeıdegi bilimge, sonyń ishinde qosymsha bilimge qoljetimdilikti qamtamasyz etý.
• Psıhologıalyq-pedagogıkalyq qoldaý – balalardyń úılesimdi damýyna yqpal etetin bilim berý ortasynda súıemeldeý.
• Psıhologıalyq ál-aýqat – bilim alýshylardyń emosıonaldyq jáne mentaldyq densaýlyǵyn nyǵaıtýǵa baǵyttalǵan sharalar.
Qosymsha túrde balalardyń densaýlyǵyna yqtımal qaýipterdiń aldyn alý maqsatynda bilim berý mekemelerinde tamaqtanýdy uıymdastyrý boıynsha usynymdar berildi. Bul nátıjeler balalardyń quqyqtaryn qorǵaý jáne baqylaý tetikterin kúsheıtý boıynsha júıeli jumysty jalǵastyrýdyń mańyzdylyǵyn atap kórsetedi.