«Qazaq Book Fair» kitap kórme-jármeńkesin uıymdastyrýshy – Qazaqstan Respýblıkasynyń Ulttyq kitaphanasy jáne «Folıant» baspasy». «Folıant» – baspa ındýstrıasynda 1996 jyldan beri jumys istep kele jatqan kópsalaly qazaqstandyq baspa.
Baspa jyl saıyn júzdegen álemdik úzdik týyndylardy qazaq tiline aýdaryp jáne basyp shyǵarady. Folıanttyń assortımentinde qazaq ádebıetiniń jaýharlary, álemdik klasıka, ǵylymı-tanymdyq eńbekterdiń san myń túri bar.
«Qazaq Book Fair» kitap kórme-jármeńkesine «Folıant» baspasy jáne «Qasym» baspa úıi men «Knıjnyı klýb» baspasy qatysady. Halyq arasynda kitap oqýdy nasıhattaý isinde kórmeniń mańyzy zor. Baspa salasy damyǵan, kitapty súıip oqıtyn ár elde kitap kórmesi jıi ótkiziledi.
Memleket basshysy Qasym-Jomart Toqaev Ulttyq quryltaıdyń úshinshi otyrysynda:
«Kitapqumarlyq – jaqsy qasıet. Mysaly, kóptegen memleket Ulttyq kitap kúnin atap ótedi. Men Ulttyq kitap kúnin belgileý týraly usynysty qoldaımyn. Biraq ony mazmundy etip ótkizý qajet. Mysaly, túrli is-sharalar uıymdastyryp, arnaıy jármeńkeler ótkizý qajet. Shyn máninde, ozyq oıly ult bolýdyń eń tóte joly – kitap oqý. Sondyqtan kitap oqý mádenıetin qoǵamda barynsha ornyqtyrýymyz kerek», - dep atap ótkendeı, bul kórmeniń maqsaty – balalar men jasóspirimderdi kitap oqýǵa baýlý, otbasymen birge kitap oqýdy nasıhattaý, jastardyń oqyrmandyq talǵamyn qalyptastyrý.
«Qazaq Book Fair» kitap kórme-jármeńkesi úsh kúndik mádenı-iskerlik baǵdarlamadan turady. Kórme aıasynda jańa kitaptardyń tusaýkeserleri, avtormen kezdesý, avtograf-sessıalar ótkiziledi. Atap aıtar bolsaq, «Folıant» baspasynan jaryq kórgen Ularbek Dáleıulynyń «Joshy han» atty tarıhı romany, Qanaǵat Ábilqaıyrdyń «Perishteler joq jerde» kitaby, Álisher Rahattyń «Mahabbatym - Constant. Paralel» romandarynyń, «Knıjnyı klýb» baspasynan jaryq kórgen Iýrıı Serebránskııdiń «Chernaıa zvezda» kitaby, Danıar Qýantqanovtyń «Marám» kitabynyń tanystyrylymy josparlanyp otyr. Sondaı-aq jármeńkede Gúzel Iahına, Álibek Asqarov sıaqty jazýshylarmen kezdesýge qatysyp, avtordyń qoltańbasyn alýǵa, kez kelgen kitapty baspa baǵasymen satyp alýǵa bolady.
