2025 jyldyń basynan otbasy máseleleri, áıelder men balalardyń quqyqtaryn qorǵaý boıynsha memlekettik «111» biryńǵaı baılanys ortalyǵyna 40 myńnan astam ótinish kelip tústi.
Onyń ishinde 339 ótinish telefon arqyly qabyldansa, qalǵany bilim berý uıymdarynda ornalastyrylǵan QR-kodtar arqyly joldanǵan, dep habarlaıdy aqshamnews.kz Oqý-aǵartý mınıstrligine silteme jasap.
Ótinishterdiń basym bóligi aqparattyq sıpatta boldy – balalarǵa anyqtamalyq málimetter, keńester berilip, sondaı-aq psıhologıalyq qoldaý kórsetildi. Kúrdeli jaǵdaılarda tıisti organdardyń qatysýymen vedomstvoaralyq kómek uıymdastyryldy.
«111» baılanys ortalyǵy ótinish bildirýshilerdiń jeke derekteriniń qupıalyǵyn jáne anonımdiligin tolyqtaı qamtamasyz etedi. Qajettiligine qaraı ol quqyq qorǵaý, qorǵanshylyq organdaryna nemese basqa da múddeli memlekettik mekemelerge beriledi. Ortalyq polısıamen, densaýlyq saqtaý jáne bilim berý uıymdarymen, sondaı-aq úkimettik emes uıymdarmen tyǵyz baılanysta jumys istep, balalardyń quqyqtary men múddelerin qorǵaýǵa baǵyttalǵan shuǵyl sharalar qabyldaıdy.
«Bul baılanys ortalyǵy balalarǵa ózderiniń oılaryn, kóńil-kúıleri men máselelerin qymsynbaı, qoryqpaı jetkizýge múmkindik beredi. Mundaı bastama balalar úshin qolaıly orta qalyptastyrýǵa, ashyq dıalog mádenıetin damytýǵa jáne qoǵamnyń psıhologıalyq ál-aýqatyn jaqsartýǵa yqpal etedi», – deıdi QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Aıta keteıik, 2024 jylǵy shilde aıynda qabyldanǵan «Áıelderdiń quqyqtary men balalardyń qaýipsizdigin qamtamasyz etý týraly» zań aıasynda «111» baılanys ortalyǵynyń qyzmeti zańnamalyq túrde bekitildi. Al 2025 jyldyń qańtar aıynan bastap mektepter men kolejderde ortalyqqa jedel qol jetkizýge múmkindik beretin QR-kodtar ornalastyryldy. Bul bastama QR Bala quqyqtary jónindegi ýákilmen birlesip júzege asyryldy.