Sondaı-aq onyń aıtýynsha, QR Prezıdenti janyndaǵy Memlekettik basqarý akademıasy men «Amanat» partıasy mınıstrliktiń qoldaýymen aýdandyq mańyzy bar qalalar, aýyldar, kentter men aýyldyq okrýgter ákimderin qaıta daıarlaý baǵdarlamasyn ázirledi.
Jobanyń negizgi maqsattary – jergilikti ózin-ózi basqarý máselelerin tıimdi sheshý jáne ákimderdiń kásibı jáne basqarýshylyq quzyretterin arttyrý esebinen turaqty áleýmettik-ekonomıkalyq damýdy qamtamasyz etý.
Oqytý qorytyndysy boıynsha qatysýshy aýyldyq okrýgterdiń Ekonomıkalyq damý baǵdarlamalaryn ázirleıdi. Qazirgi ýaqytta baǵdarlama aıasynda elimizdiń 17 óńirinen 1 815 aýyl ákimi bilim alýda. Budan bólek, aýyldyq okrýg ákimderiniń ókilettikterin keńeıtý maqsatynda mynadaı sharalar usynylady:
- ákimderge azamattyq qyzmetshilerge eńbekaqy tóleýdiń belgilengen júıesi boıynsha eńbek sharty sheńberinde jumyskerlerdi jaldaý quqyǵyn berý;
- halyqqa aqyly qyzmet kórsetý quqyǵymen arnaıy tehnıka men aýyl sharýashylyǵy tehnıkasyn satyp alýǵa ruqsat berý;
- ákimder men olardyń apparattarynyń kóshe saýdasyn monıtorıńileý, qoǵamdyq oryndardy abattandyrý, balalar oıyn alańdaryn paıdalanýdy baqylaý, aqyly qyzmetter kórsetý jáne basqa da máseleler boıynsha ókilettikterin keńeıtý.
«Bul ınovasıalar Parlament Májilisiniń depýtattarymen qosymsha pysyqtalatyn bolady», – dep tolyqtyrdy spıker.
Baýyrjan Omarbekov atap ótkendeı, taǵy bir ózekti másele – aýyl búdjetiniń kiris kózderin keńeıtý. Qazirgi ýaqytta búdjettiń 4 deńgeıindegi kirister salyq túsimderiniń 8 túri jáne aýdandyq búdjetten túsetin túrli túsim, aıyppuldar men transfertter esebinen qalyptastyrylady.
4 deńgeıdegi kirister engizilgen sátten bastap kirister eki esege ósti. Máselen, 2023 jyldyń qorytyndysy boıynsha 4 deńgeıdegi búdjettiń josparly túsimderi 308 mlrd teńgeni qurady, al is júzinde 320 mlrd teńge tústi, bul jospardan 103,8%-ǵa joǵary. Bul rette vıse-mınıstr aýyldyq búdjetterdiń qarjylyq derbestigin arttyrý qajettigin atap ótti. Osyǵan baılanysty kelesi túsimderdi berý esebinen aýyldyq okrýgter búdjetiniń kiris kózderin keńeıtý usynylady:
- zańdy tulǵalar men jeke kásipkerlerdiń múlik salyǵynyń bólikteri;
- sý resýrstaryn paıdalanǵany úshin tólemder;
- belgili bir qyzmet túrlerimen aınalysý quqyǵy úshin lısenzıalyq alym;
- belgili bir qyzmet túrlerine lısenzıalardy paıdalanǵany úshin tólemder.
Budan bólek, Búdjet kodeksiniń jańa jobasy sheńberinde 4 deńgeıdegi búdjetke keń taralǵan paıdaly qazbalardy óndirýge salynatyn salyqty berý josparlanýda. Osylaısha, 4 deńgeıdegi búdjettiń óz kiristerin 4 esege – 68 mlrd teńgeden 263 mlrd teńgege deıin ulǵaıtý kútilýde. Aýyldyq búdjetterdiń kiris kózderin keńeıtý jónindegi jumys jalǵasady.