Qala qurylysy áleýmettik ınfraqurylymdy damytý men kógaldandyrýǵa basa nazar aýdara otyryp júrgiziledi.
Bul týraly búgin ótken Óńirlik komýnıkasıalar qyzmeti alańynda QR Qurylys salasy odaǵynyń basqarma tóraǵasy Eraly Saýranbaev málimdedi.
Almatydaǵy qurylys kompanıalary jańa qurylys erejelerimen jumys isteýge daıyn.
Eraly Saýranbaevtyń aıtýynsha, Qurylys salasynyń odaǵy, sondaı-aq barlyq qurylys kompanıalary qurylys erejelerin ázirleýge bastamashy bolǵan Almaty ákimi Baqytjan Saǵyntaevtyń sheshimin qoldaıdy.
«Biz jańa erejeler aıasynda jumys isteýge jáne qabyldanǵan normalardy qatań saqtaýǵa daıynbyz. Biz de qala turǵyndarymyz jáne sizdermen birge megapolıstiń damýyna alańdaımyz», — dedi Eraly Saýranbaev.
Spıker qalanyń sáýlet jáne qala qurylysy Memleket basshysynyń erekshe baqylaýynda ekenin aıtty. Qurylys salasy odaǵynyń ókilderi osy qujatty ázirleýge tikeleı qatysty. Barlyq qabyldanǵan normalar halyqaralyq tájirıbege sáıkes keledi, Almatynyń tarıhı ortalyǵynyń qaıtalanbas naqyshy men sáýlettik kelbetin saqtaýǵa arnaldy.
«Sonymen qatar qala qurylysy áleýmettik ınfraqurylymdy damytý men kógaldandyrýǵa basa nazar aýdara otyryp júrgizetin bolady. Almaty ómir súrýge yńǵaıly megapolıs retinde, jasyl qala mártebesin saqtap qalýy tıis», — dedi Eraly Saýranbaev.