Áleýmettik jelide Parıj Olımpıadasyna qatysatyn Qazaqstan quramasynyń formasy synǵa ilikti.
Oqyrman sportshylardyń pıdjaktary men galstýkteri nashar tigilgen "mektep formasyna" uqsas dep jazdy, dep habarlaıdy Almaty-akshamy.kz
Al úkimet basshysynyń orynbasary Tamara Dúısenova olımpıadashylardyń kıim úlgisin talqylaǵannan góri, jaqsy nátıje kútý kerek ekenin aıtty.
2024 jylǵy jazǵy Olımpıada oıyndary 26 shildede bastalyp, 11 tamyzda aıaqtalady. Sportshylarymyz jarysqa daıyndalyp jatqanymen, jeli qoldanýshylary Olımpıada quramalarynyń formasyn synǵa aldy.
Qazaqstan quramasynyń kıim úlgisi ekinshi baıqaýdan keıin ǵana maquldandy. Sebebi birinshi baıqaýdyń qorytyndysy boıynsha komısıanyń birde-bir eskızi unamaǵan kórinedi. Osylaısha týrızm jáne sport mınıstrligi kıimderdi ıspanıalyq Joma kompanıasy tigedi dep ýáde berdi.
Qazaqstandyqtardyń basym bóligi olımpıadaǵa qatysatyn sportshylar kostúmderiniń sońǵy nusqasyn taıaýda prezıdenttiń qabyldaýyndaǵy fotolardan ǵana kórdi. Osy rette oqyrmandar Olımpıada formasyn mektep formasyna balap, talǵamsyz ári nashar tigilgen dep pikir jazdy.
«Pıdjaktyń jeńi qysqa, beldemshesinde aq jolaqtary bar. Qyry synǵan shalbarlar men tizege deıin sozylǵan beldemsheler? Mundaı kıimmen jasóspirimder mektep bitirý álbomyna sýretke túsedi»;
Bul jerde sportshylarymyzdy eshkim qorlap turǵan joq. Alaıda osy formany sharasyzdyqtan kıetini óte ókinishti;
Qansha jyldan beri "Qazaqtyń" erkin, dala halqy ekeni nege eskerilmeıdi? Bizdiń "Nomad" stıldi eskerip, kóp ıdeıalardy júzege asyrýǵa bolatyn edi. Jelden, kúnnen, sheksiz daladan shabyt alyńyz! Al mońǵoldar úshin óte qýanyshtymyn. Óz ultyn halyqaralyq arenada laıyq kórsetip otyr;
Teatr kostúmi men mektep formasyn kóbirek eske túsiredi. Munysy arzan múltfılmniń keıipkerlerine tigilgen úlgiler sekildi.
Bortserikterge uqsap tur. Meniń oıymsha, bul stúardtarǵa saı. Jumys isteýge yńǵaıly ári ystyqtamaıdy. Alaıda olımpıada quramasy úshin tym oǵash kórinedi. Mynaý qysqa jeńdi kıgen sportshylar maǵan balýandar men ziltemirshilerdi elestetedi.
Bizdikiler mektepke jınalyp jatyr ma?
11 "A" vınetkasy kúshti shyǵypty», degen pikirler jazylǵan.
Premer-mınıstrdiń orynbasary Tamara Dúısenova da otandastarymyzdyń formasyna qatysty pikir bildirdi.
"Meniń oıymsha, bul – jaqsy forma. Ár elge óz kıim formasy unaıdy. Bizge ózimizdiki unap tur. Áriptester, bul qarapaıym forma. Odan da jaqsy nátıje kúteıik", – dedi Dúısenova.
Budan buryn týrızm jáne sport mınıstri Ermek Marjyqpaev Parıjde ótetin oıyndarda Azıa oıyndaryndaǵydaı kıimniń jyrtylmaıtynyna sendirgen edi.