Vıse-premer Qanat Bozymbaev, Kazakhmys Holding dırektorlar keńesiniń tóraǵasy Edýard Ogaı, Kaspi.kz dırektorlar keńesiniń tóraǵasy Vácheslav Kım jáne KAZ Minerals Management basqarma tóraǵasy Eldar Mamedov Soltústik Qazaqstan oblysyna baryp, qalpyna keltirý jumystarymen tanysty, sonymen qatar jergilikti turǵyndarmen kezdesti.
Sý tasqyny bastalǵaly oblysta 3898 úıdi sý basqan. Saıajaı aýmaǵy aıtarlyqtaı zardap shekti – 6597 ýchaske. Oblys ákimdiginiń málimetinshe, sý basqan turǵyn úılerdiń 40%-ǵa jýyǵy odan ári turýǵa jaramsyz bolýy múmkin, dep habarlaıdy almaty-akshamy.kz.
Úısiz qalǵandar ýaqytsha jataqhanaǵa ornalastyryldy. Vıse-premer evakýasıalanǵan azamattarmen kezdesýde memleket tarapynan kórsetiletin qarjylyq qoldaý sharalaryn eske saldy. Qazirdiń ózinde 3383 otbasy 100 AEK kóleminde bir rettik járdemaqy aldy.
Sondaı-aq oblys turǵyndaryna KAZ Minerals, Kazakhmys Holding jáne Kaspi.kz kompanıalary Qazaqstanda sý tasqynynan zardap shekkenderge 60 mlrd teńgege deıin qarajat bólgeni, sondaı-aq qarajattyń negizinen Soltústik Qazaqstan oblysyna baǵyttalatyny týraly aıtyldy.
«Memleket basshysynyń tapsyrmasy boıynsha men úsh iri kompanıanyń basshylyǵymen jáne aksıonerlermen birge osy óńirge keldim. Jalpy somasy 60 mlrd teńge sý tasqynynan zardap shekkenderge páter satyp alýǵa jáne úı salýǵa baǵyttalady», — dedi vıse-premer halyqpen kezdesýinde. Sondaı-aq oblys ákimdigine eki apta ishinde turǵyn úılerdi baǵalap, olardy qalpyna keltirý jumystaryn bastaý tapsyryldy.
«Mundaı jaǵdaı elimizde birinshi ret oryn alyp otyr. Bul naǵyz apat ekenin óz kózimmen kórdim. Eshkim beıjaı qalmaýy kerek. Munda bári teń. Úkimetpen birge qoldan kelgenniń bárin jasaýǵa tyrysamyz», — dedi Kaspi.kz dırektorlar keńesiniń tóraǵasy Vácheslav Kım.
Solnechnoe-2 aýylynda 100 úıdiń qurylysy bastalyp ketti. Oǵan 10 merdigerlik uıym jumyldyryldy. Joba oblys ákimdigi men «Qazaqstan halqyna» qory arasynda qol qoıylǵan memorandým aıasynda bastaý aldy. Baspanany jazdyń ortasyna deıin aıaqtaýǵa múmkindik beretin qajetti ınjenerlik ınfraqurylym men komýnıkasıalar bar.
Budan keıin Qanat Bozymbaev ónerkásip jáne qurylys mınıstri Qanat Sharlapaev pen merdigerlerdiń qatysýymen keńes ótkizdi.
«Ónerkásip jáne qurylys mınıstrine óńirdi qajetti qurylys materıaldarymen qamtamasyz etýdi, olardyń baǵasyn únemi qadaǵalap, qymbattaýyna jol bermeýdi tapsyramyn. Ár teńgege suranys bolatynyn merdigerler men ákimdikke taǵy da eske salamyn. Óńirlerdi qalpyna keltirý úderisine quqyq qorǵaý organdary jumyldyrylyp, jaǵdaıdy muqıat qadaǵalap otyr. Aýa raıy salqyndaǵansha zardap shekkenderdiń barlyǵyn qonystandyrýymyz kerek», — dep túıindedi vıse-premer.