Olardyń bir bóligi elge qaıtyp keldi.
Qazaqstannyń 100-den astam azamaty Izraılden elge qaıtýǵa kómektesýdi surady, dep habarlaıdy Almaty-akshamy.kz
Syrtqy ister mınıstrliginiń resmı ókili Aıbek Smadıarovtyń aıtýynsha, qazirgi kezde qazaqstandyqtardy qaqtyǵys aımaǵynan shyǵarý sharalaryna Izraıl, Mysyr men Iordanıadaǵy elshilikter jumyldyrylyp otyr.
“16 qazandaǵy jaǵdaı boıynsha Izraıldegi Qazaqstan elshiligine 100-den astam qazaqstandyq elden ketýge járdem kórsetýdi surady. Olardyń bir bóligi dıplomattardyń kómegimen elden ketip qaldy. Keshe 19 azamatymyz, sonyń ishinde arnaıy baǵdarlamalar boıynsha oqyǵan 15 bala ushyp shyqty”, - dedi Smadıarov búgingi brıfıńte.
Osy oraıda mınıstrlik ókili Tel-Avıvtegi áýejaı shtattyq rejımde jumys istep turǵanyn atap ótti. Kez kelgen adam bılet alyp, eline ushyp shyǵa alady.
“Buǵan deıin repatrıasıalyq reıs bolǵan. Qazir dıplomattar Qazaqstanǵa qaıtýǵa járdem kórsetýdi suraǵan azamattarǵa áýe bıletterin qaıta brondap, sol elden shyǵýǵa kómektesip júr. Qazaqstan azamattary arasynda jaraqat alǵan jáne qaza tapqandar joq”, - dep atap kórsetti Smadıarov.