«Mekteptegi shahmat» jobasy júzege asyrylyp jatyr.
Bıyl Qazaqstanda alǵash ret ótetin shahmattan respýblıkalyq olımpıada ótedi. Oǵan 100 myńnan astam oqýshy qatysady. İrikteý saıystaryna 2-11 synyp oqýshylary qatysady, dep habarlaıdy Almaty-akshamy.kz.
Olımpıada 10 qańtarda Qazaqstannyń barlyq óńiri men mektebinde bastalady. Osyndaı is-sharalar uıymdastyrý arqyly mınıstrlik elimizdegi shahmat qozǵalysyna qoldaý kórsetýdi josparlap otyr.
«Prezıdenttiń qoldaýymen «Mekteptegi shahmat» jobasy júzege asyrylyp jatyr. Shahmat fakúltatıv retinde 28 myńǵa jýyq balaǵa arnalǵan 654 mektepte engizildi. Sondaı-aq mektepterde shahmat seksıasynyń sany 10 myńnan asty. Shahmat qozǵalysyn odan ári qoldaý maqsatynda bıyl mınıstr Asqat Aımaǵambetovtiń tapsyrmasymen oqýshylar arasynda shahmattan olımpıada ótkizilgeli otyr. Jeńimpazdar men júldegerler medaldarmen, kýboktarmen jáne dıplomdarmen marapattalady. Bul oqýshylardyń shahmat qozǵalysyna qyzyǵýshylyǵyn oıatýǵa septigin tıgizedi. Bul - mektep, aýdandyq, qalalyq, oblystyq jáne respýblıkalyq kezeńderden turatyn aýqymdy týrnır. Ár mekteptiń qatysqany mańyzdy», – deıdi Orta bilim komıtetiniń tóraıymy Gúlmıra Kárimova.
Mektepterde ashylǵan seksıalardan bólek, 60 myń oqýshy qosymsha bilim berý uıymdaryndaǵy 3,5 myń shahmat úıirmesinde shahmatpen aınalysady.
Buǵan deıin mınıstr Asqat Aımaǵambetov mınıstrlik pen Shahmat federasıasy arasyndaǵy oqý-ádistemelik quraldardy daıyndaý, shahmat týrnırlerin ótkizý jáne jattyqtyrýshylar men muǵalimderdiń biliktiligin arttyrý boıynsha birlesken jumysqa qatysty kelisimder týraly aıtqan bolatyn.