Kórinbeıtin maıdannyń jaýyngerleri
Búgin - Radıoelektrondy kúres áskerleri mamandarynyń kásibı merekesi, dep habarlaıdy aqshamnews.kz Qorǵanys mınıstrligine silteme jasap.
Jergilikti soǵystar men qarýly qaqtyǵystardyń tájirıbesi kórsetkendeı, Radıoelektrondy kúres kúshteri men quraldaryn qoldaný áskerlerdiń jaýyngerlik áleýetin arttyryp, jeke quram men jaýyngerlik tehnıkany joǵaltýdy azaıtady.
Radıoelektrondyq kúres te áskerlerdiń kez kelgen basqa qyzmeti sıaqty únemi damyp keledi. Ony jetildirý radıoelektrondy kúresti uıymdastyrýdyń jáne josparlaýdyń jańa tásilderi men ádisterin tabýdan turady. Sonymen birge jańa barlaý quraldarynyń tehnıkalyq múmkindikterin tekserý jáne kedergi jasaý, elektrondy qorǵaýdyń jáne qarsylastyń barlaý quraldaryna qarsy turýdyń tıimdi ádisterin pysyqtaý úlken mańyzǵa ıe.
Bul kásip arnaıy mindetterdi sheshý úshin zamanaýı tehnologıalardy, analıtıkalyq qabiletterdi jáne joǵary ıntellektti jaqsy meńgerý qajet. Sondyqtan REK bólimsheleri elıtalyq dep tanylady.
REK mamandaryn daıarlaý Almatydaǵy Radıoelektronıka jáne baılanys áskerı-ınjenerlik ınstıtýtynda júzege asyrylady. Onyń túlekteri radıoelektrondyq jaǵdaıdy jedel baǵalaýǵa, qajetti esepteýler júrgizýge, sondaı-aq zamanaýı quraldar men keshenderdi sheber paıdalanýǵa qabiletti.
Aqparattyq soǵystardyń memlekettiń turaqtylyǵy men qaýipsizdigine destrýktıvti áseriniń artýyna baılanysty QR Qarýly kúshterindegi radıoelektrondyq kúres áskerleriniń róli de artyp keledi.
Eshkim radıoelektrondyq kúres jarıalamaıdy, biraq eshqashan toqtamaıdy. Ol keńistik pen ýaqyt shekaralaryn bilmeıdi. Sondyqtan bul sala mamany úshin sekýnd saıynǵy qyraǵylyq mańyzdy bolyp tabylady.