Germanıanyń eń iri áýejaılarynda 10 naýryz, dúısenbi kúni 24 saǵattyq eskertý ereýili bastaldy.
Áýejaı operatorlaryn, jerústi qyzmetkerleri men avıasıalyq qaýipsizdik qyzmetkerlerin ereýilge shyǵýǵa nemistiń Ver.di kásipodaǵy shaqyrdy, dep habarlaıdy aqshamnews.kz.
Ereýil Berlın-Brandenbýrg, Shtýtgart, Kóln/Bonn, Dússeldorf, Dortmýnd, Múnhen, Gambýrg, Frankfýrt-na-Maıne, Gannover, Bremen jáne Leıpsıg/Galle áýejaılaryn qamtydy. Vese jáne Karlsrýe/Baden-Baden áýejaılarynda tek jolaýshylardy, personaldy, júkter men taýarlardy tekserýmen aınalysatyn avıasıalyq qaýipsizdik qyzmetkerleri ereýilge shyqty.
Nemis áýejaılarynyń ADV qaýymdastyǵynyń baǵalaýy boıynsha, Ver.di uıymdastyrǵan ereýil 3400-den astam reıstiń toqtatylýyna ákelip, shamamen 510 000 jolaýshyǵa áser etýi múmkin.
Profsoıýz talaptary:
• Jalaqyny 8 paıyzǵa, biraq aıyna keminde 350 eýroǵa arttyrý
• Qıyn jumys jaǵdaılary úshin ústemeaqylardy kóbeıtý
• Qyzmetkerlerge qosymsha demalys kúnderin berý
Ver.di málimdemesinde bul ereýil shamamen 25 000 qyzmetkerdiń eńbek jaǵdaıyn jaqsartý úshin qajet ekeni aıtylǵan.
9 naýryz kúni, josparlanǵan ereýil qarsańynda, Gambýrg áýejaıynyń jerústi personaly kútpegen jerden jumysyn toqtatty. Sonyń saldarynan 40 000 jolaýshy zardap shekti. NDR telearnasy habarlaǵandaı, kóptegen jolaýshylar joljúgin ótkizip qoıǵandyqtan, ony qaıtara almaǵan.
Germanıanyń áýe qozǵalysyn basqarý qyzmetiniń málimetinshe, ádette eldiń áýejaılarynda kúnine 6000 reıs (ushyp-qoný) jáne 3000 tranzıttik áýe qozǵalysy júzege asady.