Úkimette hımıa jáne metalýrgıa salalaryndaǵy iri ónerkásip jobalarynyń júzege asyrylý barysy qaraldy
Premer-mınıstr Oljas Bektenov hımıa jáne metalýrgıa salalarynda joǵary deńgeıde óńdelgen ónim shyǵaratyn klaster qurýǵa baǵyttalǵan iri ónerkásip jobalaryn júzege asyrý máseleleri boıynsha keńes ótkizdi. Memleket basshysy Qasym-Jomart Toqaevtyń tapsyrmasyna sáıkes, eksportqa baǵdarlanǵan óndiristi qalyptastyrý jumystary júrgizilýde.
Ónerkásip jáne qurylys mınıstri Ersaıyn Naǵaspaev búginde jalpy ınvestısıa kólemi shamamen $10 mlrd jáne 8,7 myńnan astam turaqty jumys ornyn ashatyn 5 iri bastamanyń júzege asyrylyp jatqanyn baıandady.
Abaı oblysynda qýattylyǵy 300 myń tonna katodty mys balqytý zaýytynyń qurylysy júrgizilýde. Investısıanyń jalpy kólemi $1,5 mlrd-qa jetedi. Zaýyt jumys istep turǵan Bozshakól, Aqtoǵaı jáne Shyǵystústimet ken oryndarynan konsentrattardy óńdeýge arnalǵan. 1 myńnan astam turaqty jumys ornyn ashý kózdelgen. Búgingi tańda joba Biryńǵaı ındýstrıalandyrý kartasyna engizilip, ınfraqurylymǵa qosylý boıynsha is-sharalar júrgizilýde.
Qaraǵandy oblysynda «Qarmet» AQ óndiris kólemin arttyra otyryp mashına jáne avtomobıl jasaý kásiporyndary úshin ónimniń jańa túrlerin shyǵarý arqyly aýqymdy jańǵyrtý baǵdarlamasyn iske asyrýda. Investısıa kólemi $3,5 mlrd-ty quraıdy. 2028 jylǵa deıin jyl saıyn 9 mln tonnaǵa deıin kómir óndirýdi, 5 mln tonnaǵa deıin temir keni konsentraty men bolat óndirýdi qamtamasyz etý josparlanýda. 2 myń jańa jumys orny ashylady. Buǵan deıin júrgizilgen jumystardyń nátıjesinde 2024 jyly óndiristik qyzmet tolyq qalpyna keltirildi, jabdyqtardy kúrdeli jóndeý aıaqtaldy, 8 shahtanyń 7-eýinde kómir óndirý jumystary júrgizilýde, bul óndirý kólemin 7%-ǵa arttyrýǵa múmkindik berdi.
Qostanaı oblysynda «SSKÓB» AQ bazasynda qýaty jylyna 2 mln tonna, quramynda 90%-dan astam temir bar ystyq brıkettelgen temir óndiretin zaýyt salý josparlanýda. Kásiporyn metalýrgıada ekologıalyq taza tehnologıalardy engizý úshin tirek nysanyna aınalady. Búgingi tańda halyqaralyq qarjy ınstıtýttarynyń qatysýymen gaz jetkizý, ınfraqurylymǵa qosylý jáne qarjylandyrý kózderi máseleleri pysyqtalýda. Investısıalardyń jalpy kólemi $1,2 mlrd-ty quraıdy. Jobany júzege asyrý nátıjesinde 1 myń turaqty jumys orny ashylady.
Batys Qazaqstan oblysynda «Satımola» ken orny bazasynda kalıı hlorıdin shyǵarý boıynsha baıytý-óndiristik keshen salý jobasy iske asyrylýda. Kásiporyn qýatyn jylyna kalıı hlorıdin 12 mln tonnaǵa deıin birtindep arttyra otyryp, tórt kezeń boıynsha iske qosylady dep josparlanýda. Qazirgi ýaqytta jobada burǵylaý jumystary júrgizilýde, jer telimderi alyndy, taý jynystaryn muzdatý úderisteri iske qosyldy, syrtqy ınfraqurylym qalyptasýda. Jobanyń jalpy quny $2,4 mlrd-tan asady.
Sondaı-aq Premer-mınıstrge Mańǵystaý oblysyndaǵy «KazAzot Prime» JSHS amıak-karbamıd kesheniniń qurylysy týraly baıandaldy. Joba ishki naryqtyń mıneraldy tyńaıtqyshtarǵa degen suranysyn qamtamasyz etedi. İske asyrý nátıjesinde 700 jumys orny ashylady. İske qosý 2029 jyly kútilýde. Investısıa kólemi shamamen $1,5 mlrd.