Memlekettik arhıv: qujattar sıfrlandyryldy, tehnıkalyq jabdyqtar jańardy, mamandardyń jalaqysy ósti
Tehnıkalyq turǵyda kúrdeli jumysty tez ári sapaly iske asyrý úshin Memlekettik muraǵat materıaldyq-tehnıkalyq bazany jańartyp, Qujattardy qalpyna keltirý zerthanasyn ashty. Osy maqsatta qalalyq búdjetten sońǵy 10 jylda birinshi ret qarjy bólindi.
Osylaısha, Almatynyń memlekettik arhıvi planetarlyq tıptegi kópformatty jeti skaner, A3 jáne A2 formatyndaǵy kóp aǵyndy jeti skaner, obektilerdiń 3D ınteraktıvti keskinin jasaýǵa arnalǵan júıe, mıkrofılmge arnalǵan COM júıesin, mıkrofılm oqýǵa arnalǵan jabdyqty, keń formatty plotterdi, elektr gılotınin, qujattardy qalpyna keltirýge arnalǵan pres jabdyǵyn, jaryq ústelin, qaǵaz jáne pergament betindegi qujattardy qalpyna keltirýge arnalǵan mýltıfýnksıonaldy jabdyqty, sondaı-aq 110 monoblok pen 34 kompúter satyp aldy.
«Qaǵaz qujattardy sıfrlyq formatqa kóshirý – ýaqyt talaby. Arhıvte qaǵaz betindegi jáne aýdıovızýaldy qujattardy sıfrlandyrý jumysy qarqyndy júrip jatyr. Ony tek zamanaýı ári myqty tehnıkanyń kómegimen júzege asyrýǵa bolady. Sondyqtan qala ákimi Erbolat Dosaev sala ókilderine úlken qoldaý kórsetý boıynsha birqatar sheshim qabyldady. Máselen, sońǵy eki jylda arhıvtegi materıaldyq-tehnıkalyq baza jańaryp, mamandardyń jalaqysy 30%-ǵa ósti. Sondaı-aq mekemedegi stasıonarlyq sórelerdiń ornyna mobıldi sóreler alyndy. Sol arqyly qujattardy qabyldaý jáne saqtaý orny keńeıdi», – dedi Almaty qalasy Mádenıet basqarmasynyń basshysy Ǵanı Maılybaev.