Bul týraly Oqý-aǵartý mınıstrliginiń baspasóz qyzmeti habarlady.
Qujat qabyldaý 1 tamyzǵa deıin jalǵasady, dep habarlaıdy Almaty-akshamy.kz
Oqý-aǵartý mınıstrligi orta bilim komıtetiniń habarlaýynsha, búginde 1-synypqa qabyldaýǵa 249 737 ótinish túsken. Onyń ishinde balalardyń 70%-ǵa jýyǵy memlekettik tilde oqytýdy tańdaǵan.
"Qujat qabyldaý shtattyq rejımde júrgizilip jatyr. Ata-analar belsendilik tanytyp jatyr. Bıylǵy birinshi synypqa qabyldanýshylar arasynda memlekettik tilde oqyǵysy keletinder kóp. Qazaq tilinde oqytatyn synyptarǵa qabyldaý boıynsha Qyzylorda (94,1%), Mańǵystaý (93,2%), Ulytaý (82,5%), Túrkistan (80,6%) jáne Jambyl (79,4%) oblystary eń joǵary kórsetkishpen alda tur", – dedi komıtet tóraǵasynyń orynbasary Jomart Qarambaev.
1-synypqa qabyldaý boıynsha ótinimderdiń joǵary kórsetkishteri de Qyzylorda (92%), Ulytaý (83,7%), Shyǵys Qazaqstan (78%), Mańǵystaý (87,1%) Túrkistan (79,8%) oblystarynda baıqalady.
Halyqqa yńǵaıly bolý úshin qujattardy qabyldaý memlekettik qyzmeti tolyǵymen avtomattandyrylǵan. 1-synypqa qabyldaý Egov.kz elektrondy úkimet veb-portaly arqyly júzege asyrylady. 1-synypqa balalar 6 jastan bastap ata-anasynyń nemese balanyń zańdy ókiliniń ótinishi negizinde qabyldanady. Sonymen qatar densaýlyq jaǵdaıy týraly qujattar (026/ý-3 nysany jáne 065/ý) jáne 3h4 ólshemdi 2 foto qosa beriledi. Aldyn ala boljam boıynsha, jańa oqý jylynda 410 myńnan astam bala 1-synypqa barady.