1 shildeden bastap Almaty qalasynda mektepke deıingi uıymdardy vaýcherlik qarjylandyrý júıesi engiziledi, - dep habarlaıdy aqshamnews.kz.
2025 jylǵy 1 shildeden bastap Almaty qalasynda Qazaqstan Respýblıkasy Oqý-aǵartý mınıstrliginiń 2024 jylǵy 30 jeltoqsandaǵy №372 buıryǵymen bekitilgen óńirlerdiń Pılottyq jobaǵa kóshý kestesine sáıkes mektepke deıingi uıymdardy vaýcherlik qarjylandyrý júıesi engiziledi.
Bul jańashyldyqtyń basty maqsaty — mektepke deıingi bilimniń qoljetimdiligi men sapasyn arttyrý, básekelestikti kúsheıtý jáne ata-analarǵa balabaqsha tańdaýda erkindik berý.
Vaýcherlik júıe arqyly ata-analar memlekettik te, jekemenshik te balabaqshalardyń qyzmetterin tóleýge múmkindik alady.
2025 jylǵy 1 shildeden bastap ata-analar mektepke deıingi bilimge arnalǵan vaýcherler ala alady. Almaty qalasynda baǵdarlamaǵa 988 mektepke deıingi uıym qatysady, onyń ishinde:
o 196 — memlekettik balabaqsha,
o 792 — jekemenshik;
Uıymdy tańdaý bos orynnyń bolýyna baılanysty júzege asyrylady. Vaýcher rásimdeý elektrondy https://balabaqsha.snation.kz/ portaly arqyly júrgiziledi.
Baǵdarlamanyń maqsattary:
● Mektepke deıingi bilimniń barlyq áleýmettik toptar úshin qoljetimdiligin arttyrý;
● Ata-analardyń tańdaý erkindigin qoldaý jáne bilim berý qyzmetteriniń ıkemdiligin arttyrý;
● Mektepke deıingi bilim berý salasynda jekemenshik sektordy damytý;
● Básekelestik pen qarjylandyrýdyń ashyqtyǵy arqyly kórsetiletin qyzmetterdiń sapasyn jaqsartý.
Qalaı jumys isteıdi:
1. Ata-analar https://balabaqsha.snation.kz/ elektrondy portaly arqyly vaýcher alý úshin ótinish beredi;
2. Vaýcher balanyń balabaqshada bolý qunynyń bir bóligin jabady;
3. Qarjylandyrý balabaqshaǵa tikeleı balanyń barýyn rastaǵannan keıin beriledi;
4. Baǵdarlamaǵa qatysatyn jekemenshik balabaqshalar belgilengen sapa standarttaryna saı bolýy kerek.
Baǵdarlamaǵa qatysý úshin resmı portalǵa https://balabaqsha.snation.kz/ kirip, vaýcher alý úshin ótinish berý qajet.