2025 jylǵy 1 qyrkúıekten bastap Qazaqstannyń barlyq mektepteri men kolejderinde balalardyń emosıonaldyq ál-aýqatyn qamtamasyz etýge baǵyttalǵan «DOSBOLLiKe» antıbýllıngtik baǵdarlamasy engiziledi.
Bul týraly búgin Ortalyq komýnıkasıalar qyzmetinde ótken brıfıńte sala ókilderi málimdedi, dep habarlaıdy aqshamnews.kz.
Qazirgi ýaqytta baǵdarlama elimizdiń 9 óńirinde pılottyq rejımde synalýda. Oǵan 70 myńǵa jýyq oqýshy men 5 myńnan astam pedagog qatysýda.
«Bul bastama oqýshylardyń daý-janjaldarǵa konstrýktıvti túrde jaýap berý daǵdylaryn qalyptastyrýǵa, áleýmettik-emosıonaldyq qabiletterin damytýǵa, tulǵaaralyq jáne toparalyq qarym-qatynastardy ońtaılandyrýǵa, sondaı-aq balalardyń jalpy psıhologıalyq ál-aýqatyn arttyrýǵa baǵyttalǵan. Árbir balanyń ózin qaýipsiz sezinetin jáne tolyqqandy damıtyn ortada bilim alýyna jaǵdaı jasaý – asa mańyzdy qadam», – dep atap ótti QR Oqý-aǵartý vıse-mınıstri Edil Ospan.
Baǵdarlama pılottyq joba retinde júzege asyrylyp jatqan óńirlerde barlyq qatysýshylarǵa arnalǵan oqytý kýrstary men praktıkalyq sharalar uıymdastyrylýda. Olar býllıngtiń aldyn alý, qaqtyǵys jaǵdaılarynyń sebepteri men faktorlaryn anyqtaý, sondaı-aq olardy sheshý joldaryn túsindirýge baǵyttalǵan.
Sonymen qatar oqýshylar men olardyń ata-analaryna arnalǵan is-sharalar ótkizý kózdelgen, onda «DOSBOLLiKe» baǵdarlamasynyń maqsaty men iske asyrý ádisteri túsindiriledi.