1 naýryzda Qazaqstan boıynsha sırena iske qosylady. Respýblıka boıynsha azamattyq qorǵaýdyń qulaqtandyrý júıesi tekseriledi, dep habarlaıdy Almaty-akshamy.kz Tengrinews.kz-ke silteme jasap.
Vedomstvo málimetinshe, dúnıejúzilik azamattyq qorǵanys kúni sheńberinde 1 naýryz saǵat 9.00-den 12.00-ge deıin azamattyq qorǵaýdyń qulaqtandyrý júıesine respýblıkalyq tekserý júrgiziledi.
«Tótenshe jaǵdaılar týraly halyqty qulaqtandyrý jáne habardar etý - turǵyndardy tabıǵı qubylystardyń ártúrli faktorynyń áserinen bolatyn apattyń nemese joıqyn áserdiń saldarynan qorǵaýǵa múmkindik beretin negizgi qaýipsizdik sharasy. Qulaqtandyrý júıesin tekserý kezinde elektr dabyldaryn jáne sırenalyq sóıleý qurylǵylaryn (daýys zoraıtqyshtardy) qysqa merzimge qosylady, sonymen birge teledıdar jáne radıoarnalarynyń efıri ustalady, ınternet-resýrstar men mobaıl qoldanbalarda aqparat ornalastyrylady», - delingen habarlamada.
«Barshanyń nazaryna!» dybystyq sıgnaly - bul qaýip tóngen nemese tótenshe jaǵdaı týyndaǵan kezde barlyq shuǵyl habarlamalardy berýdiń aldynda halyqtyń nazaryn aýdarý úshin beriletin eskertý sıgnaly.
«Dybystyq sıgnaldy estigen kezde teledıdarlar men radıoqabyldaǵyshtardy qosý kerek, Internet-resýrstardaǵy jáne mobıldi qosymshalardaǵy aqparatty týyndaǵan jaǵdaıda odan ári áreket etý týraly nusqaýlar alý úshin oqyp shyǵý kerek», - delingen habarlamada.
Sonymen qatar, qaýipti óndiristik nysandar men gıdrotehnıkalyq qurylystardaǵy jergilikti qulaqtandyrý júıeleriniń jaramdylyǵy tekseriledi.
Qulaqtandyrý júıesine respýblıkalyq tekserý júrgizý qulaqtandyrý jabdyǵyn ázirlikte ustaýǵa jáne halyqty yqtımal tótenshe jaǵdaılardan qorǵaýǵa baǵyttalǵan.