Qazaqstanda barlyq bankterdi qolma-qol emes tólemderge arnalǵan biryńǵaı QR-kod júıesine qatysýǵa mindetteýi múmkin.
Júıeniń biryńǵaı operatory – Ulttyq bankke 100% tıesili ulttyq tólem korporasıasy bolady. Qazirgi ýaqytta elimizdegi barlyq qolma-qol emes tólemderdiń 90%-y nemese kún saıyn shamamen 5,9 trln teńge osy korporasıa arqyly ótedi. Qarjy retteýshisiniń tóraǵasy Tımýr Súleımenovtiń aıtýynsha, biryńǵaı QR-kod júıesinde tolyqqandy jumys istep jatqan 3 bank bar, taǵy 9 bank synaq rejıminde.
– Jyl sońyna deıin banktermen seriktestik qarym-qatynas arqyly nemese zańnamaǵa engiziletin túzetýler negizinde barlyq bankti júıege qosý mindeti tur. Biz bul baǵytta eki jolmen qatar qozǵalamyz. Bankter bul prosesti túsinip otyr. Munda másele – bul úlken tehnologıalyq joba. Ár banktiń óziniń júıesi bar, árqaısysy jeke ekojúıesin damytýǵa tyrysady. Endi olardyń barlyǵyn biryńǵaı ortalyqqa, biryńǵaı operatorǵa qosý qajet. Bul – qosymsha shyǵyn, adamı jáne tehnologıalyq resýrstar talap etedi, – dedi Ulttyq bank basshysy.
Qazaqstanda biryńǵaı QR-kod júıesiniń pılottyq jobasy 2024 jyldyń qarashasynda iske qosylǵan.