Búgin – Tuńǵysh Prezıdent kúni. 2012-2021 jyldary memlekettik mereke retinde toılandy.
Al byltyrǵy qyrkúıekten beri bul tizimnen shyǵaryldy. Májilistiń taratqan málimetine sáıkes, Memlekettik rámizder kúni, Alǵys aıtý kúni sıaqty qoǵamdyq mańyzy joǵary dataǵa aınaldy. Bul – prezıdenttik ınstıtýt salasyndaǵy aýqymdy reformanyń bastaýy edi. Osydan 12 jyl buryn Senat 1 jeltoqsandy Tuńǵysh Prezıdent kúni retinde bekitti. Árıne, bul datanyń tańdalýy kezdeısoq emes. 1991 jyldyń dál osy kúni Qazaqstanda alǵash ret prezıdent saılaýy ótken-di. Sóıtip, 9 jyl boıy joǵary deńgeıde toılanyp keldi. Alaıda, byltyr memlekettik merekeler tiziminen alyndy. Áıtse de, sarapshylar bul kúnniń tarıhı mańyzy zor ekenin aıtady.
«1 jeltoqsan bizdiń tarıhymyzda báribir qalady. Memlekettik deńgeıdegi mereke bolmasa da, tarıhı óte mańyzdy data. Jalpy, prezıdent ınstıtýty – qazaqtyń tarıhynda burynnan kele jatqan ınstıtýt. Eń alǵashqy prezıdenttik ınstıtýtty saıası júıege engizý kerek degen, 17-jylǵy Alash partıasynyń baǵdarlamasy bolatyn. Prezıdent ınstıtýty – qoǵamnyń biregeıligin saqtap qalatyn ınstıtýt retinde bizdiń saıası júıeniń negizgi ınstıtýttarynyń birine aınaldy», - dedi QR Parlamenti májilisiniń depýtaty Erkin Ábil.
2019 jyly elimizde saıası jańǵyrý bastaldy. Al byltyr kóktemde prezıdent ınstıtýtynyń reformasy túbegeıli qolǵa alyndy. Qazaqstan sýperprezıdenttik júıeden bas tartty.
«Men buǵan deıin aıtqanymdaı, Qazaqstanda sýperprezıdenttik basqarý úlgisi qalyptasty. Damýdyń bastapqy kezeńinde memleketimizge mundaı úlgi qajet boldy. Biraq, biz bir orynda turǵan joqpyz. Qoǵam da, elimiz de ózgerýde. Saıası júıemiz jańa jaǵdaılarǵa beıimdelýge tıis. Qazir bizde barlyǵy Prezıdentke kelip tireledi. Bul – durys emes», - deıdi Qazaqstan Respýblıkasynyń Prezıdenti Qasym-Jomart Toqaev.
Prezıdent AMANAT partıasynyń tóraǵalyǵynan ketip, keıin partıadan shyqty. Osylaısha, ózge de partıalardyń básekelestigine jaǵdaı jasady. Taǵy bir ózgeris – Memleket basshysynyń burynǵydaı aýdan-qala ákimderin qyzmetinen bosatýyna quqy joq. Osyǵan uqsas birneshe norma joıyldy. Bul reforma Prezıdenttiń qolyn bosatyp, bar kúsh-jigerin strategıalyq damýǵa arnaýǵa múmkindik berdi.
«Prezıdent óziniń ınaýgýrasıasynan keıin, mysaly 19 elge issaparyn jasady, halyqaralyq issaparlaryn. Bul ne degen sóz? Prezıdenttiń basty, úlken nazary halyqaralyq saıasattaǵy, syrtqy saıasattaǵy máselelerge arnalǵan. Iaǵnı, búgingi ınvestısıa máselesi, odan basqa Qazaqstannyń basqa memlekettermen qarym-qatynasy degen máselelerdiń barlyǵyna óziniń jumysyn, búkilin soǵan arnap otyr», - QSZI dırektorynyń orynbasary Alýa Joldybalına.
Memleket basshysynyń jaqyn týystaryna saıası memlekettik qyzmetshi bolýǵa jáne kvazımemlekettik sektorda basshylyq laýazymdardy ıelenýge zań júzinde tyıym salyndy. Iaǵnı, at tóbelindeı toptyń emes, halyqtyń múddesi aldyńǵy orynda turýy tıis. Búginde elimizde tabysty túrde júrip jatqan prezıdenttik ınstıtýt salasyndaǵy reformanyń da kózdegeni osy.