مۇرات مۇحتار ۇلى اۋەزوۆ تۋرالى ءزامانسوز
بەلگىلى مادەنيەتتانۋشىعالىم، ديپلومات، قالامگەر، مەملەكەت جانە قوعام قايراتكەرى، «تارلان» سىيلىعىنىڭ لاۋرەاتى، ق ر جۋرناليستيكا اكادەمياسىنىڭ اكادەميگى مۇرات مۇحتار ۇلى اۋەزوۆ اسىقپاي، اپتىقپاي، اياڭداي باسىپ، 80ء-نىڭ تورىنە شىعىپ كەلەدى.
ول كىسى ءبىزدىڭ Alataý Aqparat مەدياحولدينگىنە ءجيى كەلىپ تۇرادى. ءبىزدىڭ ۇلكەندى-كىشىلى قۋانىشتارىمىزعا، جەتىستىكتەرىمىزگە ىلعي تىلەكشى بولىپ جۇرەدى. لەبىزىن دە ايامايدى. بۇل ءبىزدى، ارينە، قۋانتادى. قاشان كورسەڭىز دە، ورنىقتى، جۇمساق مىنەزىمەن، بايسالدى بولمىسىمەن، ويلى جانارىمەن، جىپ-جىلى اۋراسىمەن باۋراپ الادى. ءبىز، البەتتە، قازاق دەگەن ۇلتتى ومىرشەڭ شىعارمالارى ارقىلى جەر-جاھانعا تانىتقان مۇحتار اۋەزوۆتەي تەكتى ادامنىڭ ۇرپاعىمەن، ءوزى دە تەگىن ەمەس بىرەگەي تۇلعامەن ءبىر زاماندا ءومىر ءسۇرىپ جاتقانىمىزعا ماقتانامىز.
مۇراتاي
ءيا، مۇرات اۋەزوۆ – جازۋشى مۇحتار اۋەزوۆتىڭ «مۇراتاي» دەپ ەركەلەتكەن سۇيىكتى ۇلى، ابزال انا فاتيما عابيتوۆانىڭ سۇتكەنجەسى.
مۇحتار اۋەزوۆ بالاسىنا جازعان حاتتارىنىڭ بىرىندە: «مۇراتاي! اينالايىن، جاقسى بالام! ءتىلى ءتاتتى، ءوزى ءتاتتى مۇراتايىم! سەن مەنى ساعىندىڭ با، مەن سەنى كوپ ويلاپ، كوپ ساعىنام. قاشان تاعى كورەر ەكەم دەپ ويلايمىن. ەندى كورگەندە مۇراتايىم ماعان تاعى قانداي اندەر ايتىپ بەرەر ەكەن دەپ ويلايمىن. سەن ءاندى جاقسى ايتۋشى ەدىڭ. وسى كۇندە ءتىپتى كوپ ولەڭ، ەرتەگى بىلەتىن بولعان شىعارسىڭ. ۇيرەنە بەر. ەڭ بولماسا حارىپتەر ۇيرەن. تاتەڭە ايتىپ، ماعان ءوزىڭ دە حات جاز. جازدىگۇنى مەن ساعان ۆەلوسيپەد اپەرەم، الدامايمىن، اينالايىن جانىم. ال بەتىڭنەن، كوزىڭنەن ءسۇيدىم. 04.ءىى.48 ج.»، – دەيدى. سول مۇراتاي التىعا تولار شاعىندا، جازۋشى اكە ءوزىنىڭ باسىنا ءتونىپ تۇرعان قاتەرگە دە، «حالىق جاۋىنىڭ» ايەلى رەتىندە فاتيما عابيتوۆاعا ۇلكەن شاھاردا تۇرۋعا رۇقسات ەتىلمەگەنىنە دە قاراماستان، الماتىدان شاعىن ءۇي ساتىپ الىپ، زايىبىن بالالارىمەن بىرگە الماتىعا كوشىرىپ اكەلەدى. ول تۇستا قالادا ەكى-اق قازاق مەكتەبى بولعان - №18 ۇلدار مەكتەبى جانە №12 قىزدار مەكتەبى.
سول كەزەڭدە جۇمساق كرەسلودا وتىرعان تالاي باسشى «ۇلتشىل» دەگەن اتقا يە بولىپ قالمايىن دەگەن قورقىنىشپەن بالالارىن قازاق مەكتەبىنە بەرمەگەن كورىنەدى. ال ايگىلى اۋەزوۆ «مۇراتايىمنىڭ ءتىلى قازاقشا شىقسىن» دەگەن اكەلىك اپپاق نيەتىمەن مۇراتتى تومپاڭداتىپ ءوزى قولىنان جەتەكتەپ الىپ، سول ءبىلىم وشاعىنا اكەلەدى.
جازۋشىنىڭ سۇيىكتى ۇلىنىڭ اتىن تىكەلەي اتاماي، «مۇراتايىم» دەۋىنىڭ وزىندە قانشاما مەيىرىم، ولشەۋسىز سۇيىسپەنشىلىك جاتقانىن اڭعارماۋ مۇمكىن ەمەس. بۇل جونىندە كەيىپكەرىمىزدىڭ ءوزى دە ەرەكشە ىلتيپاتپەن باياندايدى. ول اكەسىنىڭ دە، اناسىنىڭ دا شىن مانىندەگى پەداگوگتار بولعانىن ىلعي باسا ايتىپ جۇرەدى. بالا مۇرات العاش حات تانىپ جۇرگەن كەزدە اناسى شۇلىق توقىپ وتىرىپ، «اباي جولىن» وقىتاتىن كورىنەدى. كىشكەنتاي مۇراتايىنىڭ سالماعى ۇلكەن روماندى مۇرنى پىسىلداي ەجىكتەپ وقىپ وتىرعانىن كورگەندە، اكەسىنىڭ بالاشا ءماز بولاتىنى دا ءالى ەسىندە.
«ءيا، كىشكەنتاي كەزىمدە اكەمىز ءبىزدىڭ قالىپتاسۋىمىزعا، تاربيەمىزگە ەرەكشە ءمان بەرەتىن. باۋىرىم ەرنار ەكەۋمىزدى تەاترعا اپارىپ، ءتۇرلى سپەكتاكلدەردى كورسەتەتىن، سوسىن بىزدەن ونىڭ مازمۇنىن، نە تۇسىنگەنىمىزدى سۇرايتىن. قولى تيگەن كۇندەرى تابيعاتقا الىپ شىعىپ، سەرۋەندەتىپ قايتاتىن. ەرناردىڭ ءبىر دوربا اسىعى بار-تىن. اكەم ارقاردىڭ قۇلجاسىن: «مىناۋ – سەنىڭ اسىعىڭ»، – دەپ ماعان بەرىپ، اسىق ۇيرەتكەن. سودان كەيىن سپورتپەن شۇعىلدانۋىما كوپ كوڭىل ءبولدى. بىردە اكەم ەرنار ەكەۋمىزدى ەكى ايعا قىرعىزستانعا الىپ باردى. قىرعىز اعايىندار ءبىزدى قوردايدان كۇتىپ الدى. اكەم كەزىندە قىرعىزدىڭ «ماناس» ەپوسىن قورعاپ قالعان ادامداردىڭ ءبىرى عوي. سوندىقتان دا قىرعىزداردىڭ اراسىندا ول كىسىنىڭ ابىروي-بەدەلى زور بولدى. سول جولى ءبىز تۇگەلباي سىدىقبەكوۆ، ءابدىمومىنوۆ جانە اتاقتى ماناسشى ساياقباي قارالايەۆتىڭ ۇيلەرىندە مەيمان بولدىق. مەن «ماناستى» ۇيىپ تىڭداپ وتىرىپ، اكەمنىڭ قاسىنا كەلىپ، قۇلاعىنا «مەن انا كىسىنىڭ ايتقاندارىن تۇسىنەمىن» دەپ سىبىرلاعانىمدا، اكەمنىڭ بالاشا قۋانعان ءساتى كوز الدىمنان ەشقاشان كەتەر ەمەس. ايتەۋىر، اكەم ءبىزدى ءبىلىمدى دە مادەنيەتتى ازامات ەتۋگە تىرىسىپ باقتى»، – دەيدى مۇرات مۇحتار ۇلى ەستەلىكتەرىندە.
ءيا، اسقار تاۋداي اكەنىڭ ءاربىر حاتى بالاعا باعدارشام ىسپەتتى بولعانى انىق. كەيىنىرەك ماسكەۋدەن جىبەرىپ تۇرعان ءتۇرلى كىتاپتارى دا بالاڭ مۇراتتىڭ ءبىلىم كوكجيەگىنىڭ كەڭەيۋىنە، سانا بيىگىنەن كورىنە باستاۋىنا ىقپال ەتكەنى ءسوزسىز. «مۇراتاي! مەن سەنى ەندى ەرجەتتى، ەسى كىردى دەپ، مەنىڭ كىتابىمدى وقيتىن، بىلەتىن كەزى جەتتى دەپ «ابايدى» جىبەرىپ وتىرمىن. 1958 ج. 28. ءحى». ال بوزبالا مۇرات اكەنىڭ بۇل جولداۋىن بار جان-تانىمەن قابىلدادى. بۇل ورايدا كەيىپكەرىمىزدىڭ: «اباي جولىن» وقىعاندا، ول بىرەۋدىڭ جازعانى ەمەس، وزىڭە وتە جاقىن ادامنىڭ جازعانى ەكەنىن جاستايىمنان ۇعىپ ءوستىم. كىتاپتىڭ ءوزى اكەمىزدەن باستالعان سياقتى»، – دەپ كەلەتىن ەستەلىگى دە بار.
باعدارشام
مۇرات مۇحتار ۇلى اكەسىنىڭ وزىنە ماماندىق تاڭداۋدا ۇلكەن ءمان بەرگەنىن دە ءجيى ايتادى. مۇرات العاشىندا استرونوم بولامىن دەپ جۇرەدى دە، ەمتيحان تاپسىرار ءسات تاياعاندا، جانىنىڭ گۋمانيتارلىق سالاعا جاقىن ەكەنىن، ادەبيەت، تاريحتى قالايتىنىنىن تۇسىنەدى. ءسويتىپ، ون التى جاسىندا م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ شىعىس تىلدەرى ينستيتۋتىنىڭ جۇڭگو فيلولوگياسى فاكۋلتەتىنە وقۋعا تۇسەدى. جۇڭگو تىلىنە كەلۋىنە دە اكەسى سەبەپكەر بولعان ەكەن. «قىتايدىڭ تىلىندە قزاقتىڭ تاريحىنا بايلانىستى كوپتەگەن دەرەكتەر بار، سونى ءۇڭىلىپ زەردەلەۋ كەرەك»، – دەگەن بولاتىن اۋەزوۆ.
«كورەگەندىگى عوي، ول كەزدەگى وسال قىتايدىڭ بولاشاقتا ىرگەلى ەلگە اينالاتىنىن بولجادى. جوسپارلارى مىقتى ەدى، ءبىراق مەن وقۋىمدى اياقتاماي، دۇنيەدەن كەتە باردى. اكەمنىڭ سەنىمىنەن شىعۋعا بارىنشا تىرىستىم»، – دەپ جازادى مۇرات اۋەزوۆ «ءدىلىم» اتتى كىتابىندا.
ۇلتتىق رۋح
مۇرات مۇحتار ۇلىنىڭ جوعارى وقۋعا تۇسكەن ۋاقىتى كەڭەس وداعىندا جەكە باسقا تابىنۋشىلىق السىرەپ، جەرگىلىكتى ۇلتتاردىڭ ءوز تاريحى مەن مادەنيەتىن ۇلىقتاۋعا بەت بۇرا باستاعان كەزەڭ بولاتىن. مىنە، ءدال وسى ساتتە، ياعني 1963 جىلى ماسكەۋدە مۇرات اۋەزوۆ، بولاتحان تايجان، التاي قادىرجانوۆ، ءانۋار سارتبايەۆ باستاپ، «جاس تۇلپار» ۇيىمىن قۇرادى. «ۇستانعان ماقساتىمىز – وتارشىلدىق ساياساتقا قارسى شىعىپ، ۇلتتىق سانا-سەزىمدى قالىپتاستىرۋعا ۇلەس قوسۋ. ول كەزدە بۇلايشا اتوي سالۋ – وزىڭە-وزىڭ قارۋ كەزەنگەنمەن بىردەي بولاتىن. قينالعان كەزدە اكەم تۇسىمە ەنەتىن. اكەمنىڭ ءبىر جىلى جىميىسى بولاتىن. تۇسىمە سول قالپىندا ەنۋشى ەدى. سول جىميعان قالپى. ونىڭ جۇزىنەن: «قامىقپا، بالام! ءبارى جاقسى بولادى» دەگەن راي بايقايتىنمىن. ىلعي دا سولاي. اكەم تۇسىمە ەنسە، بارلىق شارۋالارىم دوڭگەلەنىپ جۇرە بەرەدى»، – دەگەنى بار مۇرات مۇحتار ۇلىنىڭ ەستەلىكتەرىندە.
جاستۇلپارلىقتار ۇگىت-ناسيحات بريگادالارىن قۇرىپ، جامبىل، شىمكەنت، قىزىلوردا وبلىستارىن، تىڭ ولكەسىن ارالاپ، كونسەرتتەر قويىپ، تاقىرىپتىق لەكسيالار ۇيىمداستىرىپ، مادەني-اعارتۋشىلىق جۇمىستار اتقاردى. سونداياق، ماسكەۋ، لەنينگراد قالالارىنىڭ كوپتەگەن وڭىرىندە دە دارىستەر وقىپ، ونەر كەشتەرىن ۇيىمداستىردى.
1969 جىلى مۇرات اۋەزوۆ ماسكەۋدە عىلىم اكادەمياسىنىڭ اسپيرانتۋراسىن ءبىتىرىپ، «قازاقتىڭ ۇلتتىق ەرەكشەلىكتەرى» دەگەن تاقىرىپتاعى ديسسەرتاسياسىن قورعاپ، ەلگە، الماتىعا اسىعا ورالادى. ءبىراق وت بولىپ جانىپ تۇرعان جاس عالىمنىڭ ۇلتشىل رۋحىنان قاۋىپتەنگەن سول تۇستاعى وقۋاعارتۋ مينيسترلىگى وعان: «سىزگە ستۋدەنتتەرمەن جۇمىس ىستەۋگە رۇقسات جوق!» دەپ، ونى جوعارى وقۋ ورىندارىنان الاستايدى. مىنە، وسى كەزدە ونىڭ تاۋىنىڭ شاعىلماۋى – الگى رۋحتىڭ ارقاسى. مويىعان جوق، قازاقستان عىلىم اكادەمياسىنىڭ فيلوسوفيا جانە قۇقىق ينستيتۋتىنا جۇمىسقا تۇرادى. تاعى دا سول جاستۇلپارلىقتار جينالىپ، الماتىدا زيالى ورتا قۇرادى. مۇرات اۋەزوۆتىڭ باسشىلىعىمەن ولار كوشپەندىلەردىڭ ەستەتيكالىق مۇراسىن جان-جاقتى زەرتتەپ، ماقالالار جيناعىن دايىندايدى. 1973 جىلى الماتىدا ازيا جانە افريكا ەلدەرى جازۋشىلارىنىڭ V كونفەرەنسياسى وتەدى. ولجاس سۇلەيمەنوۆ، ءانۋار ءالىمجانوۆ، مۇرات اۋەزوۆ، بولاتحان تايجان باستاعان "جاستۇلپارلىقتار" اتالعان قۇرلىق جازۋشىلارىنىڭ 50-دەن اسا شىعارماسىن قازاق تىلىنە اۋدارىپ شىعادى. بۇگىنگى تاڭدا قازاق قوعامىندا تەك ەكى تۇلعا عانا ۇلتتىق رۋحانياتتىڭ جولباسشىسى بولا الادى. ولار – مۇرات اۋەزوۆ پەن ولجاس سۇلەيمەنوۆ دەر ەدىك. بۇل ەكى وي تيتانىن ءومىردىڭ ءوزى قوسىپ، تاعدىرلارى اجىراماس دوستىقتىڭ ونەگەسىنە اينالدى، ال ۇلكەن ىستەردە، اسىرەسە، «نيەۆادا–سەمەي» انتيادرولىق قوزعالىسى سياقتى ماڭىزدى باعدارلاردا ولار قاشاندا بىرگە، بىر-بىرىنە سەرىك بولىپ ءجۇر.
ولاي دەيتىنىمىز، 1989 جىلدىڭ اقپانىندا و.سۇلەيمەنوۆتىڭ باسشىلىعىمەن «نيەۆادا–سەمەي» قوزعالىسى قۇرىلدى. مۇندا دا م.اۋەزوۆ الدىڭعى ساپتا تۇردى. كۋرچاتوۆ قالاسىنداعى پوليگون وفيسەرلەرىنىڭ الدىندا ءسوز سويلەدى، نيەۆادا شتاتىنداعى ارىپتەستەرمەن بايلانىس ورناتتى.
«قايدا جۇرسەك تە، وزىمىزبەن پىكىرلەس ادامداردى تابا بىلدىك. مىسالى، وسى الماتىمىزعا ورالعاندا دا وزىمىزگە رۋحتاس ءاعا-ىنى بۋىن وكىلدەرىمەن بىرگە جۇردىك. ولاردىڭ ءارقايسىسى – ۇلتتىق مادەنيەتىمىز بەن تاريحىمىزدا وشپەس ءىز قالدىرعان اسقار سۇلەيمەنوۆ، مۇقاعالي ماقاتايەۆ، ءشامشى قالداياقوۆ، نۇرعيسا تىلەندييەۆ، اقسەلەۋ سەيدىمبەكوۆ، قانى، جانى قازاق الان مەدويەۆ سياقتى الىپ تۇلعالار. ولارمەن بىرگە ەلدەن جىراقتا، ءورىستىلدى ورتادا ءجۇرىپ، شورقاقتانىپ، اقساي باستاعان انا تىلىمىزگە ورالىپ، ونىڭ نەبىر مارجاندارىمەن بارىنشا جاقىن تانىسا باستادىق. اسقار سۇلەيمەنوۆتىڭ دومبىراسىنا ابدەن ۇيرەنىپ العانىمىز سونشالىق، ەشبىر كەزدەسۋىمىز دومبىراسىز وتپەيتىن بولدى. قازاق مۋزىكاسىنىڭ سيممەترولوگياسىنىڭ نەگىزىن سالعان بولات قاراقۇلوۆ تا، قازاقتىڭ ۇلتتىق مۋزىكالىق اسپاپتارىن، ءتىپتى موڭعولياعا دەيىن بارىپ جيناقتاعان بولات سارىبايەۆ تا ءبىزدىڭ قاتارىمىزدا بولدى»، – دەيدى كەيىپكەرىمىز.
جاس تۇلپار
مۇرات اۋەزوۆ ش.ايمانوۆ اتىنداعى «قازاقفيلم» كينوستۋدياسىندا باس رەداكتور بولىپ جۇمىس ىستەپ جۇرگەن جىلدارى قازاقتىڭ كينو ونەرىنە دە تىڭ سەرپىلىس اكەلدى. 80-جىلداردىڭ اياعىندا قازاقستان جازۋشىلار وداعىندا قۇرىلعان كوركەم اۋدارما جانە ادەبي ءوزارا بايلانىستار القاسىن باسقارعان جىلدارى دا تىڭ يدەيالارىمەن كوزگە ءتۇستى. سول جىلدارى ادەبي شىعارمالاردى ورىس ءتىلى ارقىلى ەمەس، تىكەلەي قازاق تىلىنە اۋدارۋ جاعىنا دەن قويىلىپ، وعان ارنايى اۋدارماشىلار دايىندالدى.
مۇرات اۋەزوۆتىڭ 1992 جىلى قازاقستان رەسپۋبليكاسىنىڭ جۇڭگو حالىق رەسپۋبليكاسىنداعى تۇڭعىش ەلشىسى بولىپ تاعايىندالۋى دا ونىڭ ءومىر جولىنداعى ۇلكەن بەتبۇرىس بولدى. سول كەزەڭدە تالاي جىلداردان بەرى شەشىلمەي كەلە جاتقان جۇڭگو مەن قازاقستان شەكاراسى رەسمي تۇردە ايقىندالدى. سونىمەن قاتار، اباي تۋىندىلارى جۇڭگو تىلىندە «سويلەي» باستادى.
قىتايدان ورالعان سوڭ «سوروس–قازاقستان» قوعامدىق قورىنىڭ اتقارۋشى ديرەكتورى، ال 2002 جىلدان قور پرەزيدەنتى قىزمەتىن اتقاردى. قوردىڭ باسشىسى بولعان جىلدارى ول ەلىمىزدە عانا ەمەس، شەتەلدەردەگى قازاقتاردىڭ الەۋمەتتىك-مادەني دامۋ ۇدەرىسىنە زور ۇلەس قوستى. ءتۇرلى مادەني ەكسپەديسيالاردىڭ ۇيىتقىسى بولدى. «الاتاۋدان – اتىراۋعا» اتتى كىتاپ كەرۋەنىن وتكىزۋ بارىسىندا دا "جاستۇلپارلىقتار" تاعى جارق ەتتى. ناتيجەسىندە التاي، موڭعوليا قازاقتارىنا بەس مىڭنان اسا كوركەم ادەبيەت، وقۋلىقتار، ۇلتتىق مۋزىكا اسپاپتارى، ءۇنتاسپالار جەتكىزىلدى.
"جاستۇلپارلىقتاردىڭ" تاعى ءبىر جارقىن قولتاڭباسى – «مادەني مۇرا» باعدارلاماسى. ولار بۇل باعىتتا ەڭ ءبىرىنشى كەزەكتە ەلىمىزدىڭ تاريحي-مادەني پروسەسىن تۇتاس قوزعالىستار تاريحى رەتىندە قاراستىردى. وسى باعدارلاما ناتيجەسىندە بابالارىمىزدىڭ داڭقى جاڭعىردى.
امانات
1961 جىلى اكەسى ماسكەۋ اۋرۋحاناسىندا جاتقاندا ءجيى بارىپ تۇردى. اكە مۇحتار دا سونى قالايتىن. سەبەبى، الماتىداعى قالامگەرلەرگە، ادەبيەتشى قاۋىمعا حات جازاتىن دا، ولاردى كورسەتىلگەن مەكەنجاي بويىنشا الماتىعا جونەلتەتىن. «سەن ەمتيحاندارىڭدى بىتىرگەن سوڭ، ەلگە باراسىڭ. مەن تۋعان جەردى ارالاپ، قاراۋىل، جيدەباي، شىڭعىستاۋدى كورىپ كەلەسىڭ»، – دەدى بىردە. سوسىن ۇلىنا سەمەي جاققا بارعاندا كورگەن-بىلگەنىنىڭ ءبارىن كۇندەلىك ەتىپ جازىپ ءجۇرۋىن تاپسىردى. ول كەزدە مۇحتار اۋەزوۆكە يادرولىق سىناقتارعا قاتىستى، ەلدىڭ جاعدايى اۋىر ەكەنى تۋرالى كوپتەگەن حات كەلەتىن كورىنەدى. «سونىڭ ءبارىن كوزبەن كورىپ، قالامىڭمەن قاعازعا ءتۇسىر، ىستىقكولدىڭ جاعاسىندا كەزدەسكەندە وقىپ بەرەسىڭ» دەيتىن. «ارينە، ونىڭ باسقا جولدارمەن دە اقپارات الۋعا مۇمكىندىگى بولدى. دەگەنمەن، ول مەنى ەل-جەردى كورسىن، ءبىلسىن، ساناسىنا ءسىڭسىن دەگەن ەكەن. ءبىز مۇنى كەيىن تۇسىندىك قوي. مەنى اماناتتاپ، 25 ماۋسىم كۇنى كامەن ورازالينگە حات جازدى. بۇل ونىڭ تۋعان جەرىنە جازعان حاتى، قولىنا سوڭعى رەت قالام ۇستاعانى ەكەن. 26 ماۋسىم كۇنى ەشكىمدى كىرگىزبەي، ونى وتاعا دايىندادى. 27 ماۋسىم كۇنى وتا ۇستەلىندە 63 جاسىندا قايتىس بولدى. مەن اكەمنىڭ وپەراسياسىنان كەيىن سەمەيگە بارىپ كەلەتىن بولدىم دا، ول سىرقاتىنان جازىلعان سوڭ الماتىعا قايتىپ، ودان كەيىن شولپان-اتاعا باراتىن بولىپ كەلىسكەن بولاتىنبىز. ءبىراق ول ساپار جۇزەگە اسپاي قالدى. مەن اكە اماناتىن 1963 جىلى عانا ورىندادىم»، – دەيدى مۇرات اۋەزوۆ.
سودان بەرى ارادا قانشا جىل وتسە دە، مۇرات اۋەزوۆ اكە ءىزىن ءۇزىپ الماي، جالعاپ، اماناتىنا ءالى كۇنگە ادال بولىپ كەلەدى.
ازىرلەگەن نۇرجامال الىشيەۆا.
«Almaty aqshamy» گازەتى، №155-156 (6291) 29 جەلتوقسان، 2022 جىل