الماتىنىڭ يندۋستريالىق ايماعىندا شىنى ىدىس وندىرەتىن زاۋىت ىسكە قوسىلادى. بۇل تۋرالى «الماتى» الەۋمەتتىك-كاسىپكەرلىك كورپوراسياسى حابارلادى.
6،4 مىڭ شارشى مەتر اۋماقتا ورنالاسقان كاسىپورىن جىلىنا 21،6 مىڭ توننادان استام ءونىم شىعارا الادى. 58 جاڭا جۇمىس ورنى اشىلماق.
زاۋىتتىڭ اشىلۋى وتاندىق ىشكى نارىقتى تولىقتاي شىنى ىدىسپەن قامتاماسىز ەتىپ، رەسەي مەن وزبەكستاننان كەلەتىن يمپورتقا تاۋەلدىلىكتى ازايتادى.
ايتا كەتەيىك، بۇگىندە ەلىمىزدە ءۇش شىنى زاۋىتى جۇمىس ىستەيدى. ەكەۋى الماتىدا، ءبىرى شىمكەنتتە. ءقازىر ولار سۇرانىستىڭ جارتىسىن عانا وتەپ وتىر.
جوبانى «باعدار لتد» ج ش س «الماتى» اكك-نىڭ ەنشىلەس ۇيىمى – «Almaty Finance» ج ش س قارجىلاي قولداۋىمەن جۇزەگە اسىرىپ وتىر. «Almaty Business – 2025» باعدارلاماسى اياسىندا زاۋىتتى ىسكە قوسۋعا 500 ملن تەڭگە ءبولىندى. ونىڭ ىشىندە 300 ملن تەڭگە جابدىق ساتىپ الۋعا، ىسكە قوسۋ-رەتتەۋ جۇمىستارىنا جانە لوگيستيكاعا باعىتتالسا، 200 ملن تەڭگە اينالىم قاراجاتىن تولىقتىرۋعا جۇمسالدى. قارجىلاندىرۋ مولشەرلەمەسى – جىلدىق 6%، مەرزىمى – 4 جىلعا دەيىن.
«جوبا تۇراقتى ءوندىرىستى دامىتۋعا جانە سيركۋليارلىق ەكونوميكانىڭ قاعيداتتارىن قولداۋعا باعىتتالعان. شىنى ىدىس شىعارۋمەن قاتار، زاۋىت شىنى سىنىقتارىن قايتا وڭدەپ، قالدىقتى كادەگە جاراتۋ ماسەلەسىن شەشۋگە جانە قورشاعان ورتانى قورعاۋعا ۇلەس قوسادى»، – دەدى «Almaty Finance» ج ش س باسقارما ءتوراعاسى بەرىك قۇسايىنوۆ.
زاۋىتتىڭ شىنى سىنىقتارىن قايتا وڭدەۋى وندىرىستىك قالدىق كولەمىن ازايتىپ، سيركۋليارلىق ەكونوميكانىڭ دامۋىنا سەرپىن بەرەدى.