بۇگىن ب ا ق وكىلدەرىنە ۇلكەن الماتى وزەنىنىڭ ارناسىن قايتا جاڭعىرتۋ جوباسى تانىستىرىلدى. جۋرناليستەرگە جوبانىڭ ورىندالۋ بارىسى كورسەتىلىپ، سۇراقتارىنا جاۋاپ بەردى.
قالالىق ەكولوگيا جانە قورشاعان ورتا باسقارماسىنىڭ مالىمەتىنشە، قايتا جاڭعىرتۋ 5،7 شاقىرىمدىق اۋماقتا – №1 تۇندىرعىشتان باستاپ اباي داڭعىلىنا دەيىنگى بولىكتە جۇرگىزىلىپ جاتىر. جوبا اياسىندا ىرگەلەس اۋماقتى اباتتاندىرۋ كوزدەلگەن. قازىرگى تاڭدا جۇمىستاردىڭ 40%-دان استامى ورىندالدى. باسقارما ماماندارى نىساننىڭ جاي-كۇيىن كۇندەلىكتى باقىلاپ وتىر. سونىمەن قاتار، تەحنيكالىق قاداعالاۋ جانە مەملەكەتتىك ساۋلەت-قۇرىلىس باقىلاۋى تاراپىنان تۇراقتى باقىلاۋ جۇرگىزىلەدى.
جوبانىڭ مەردىگەرى – «پاۆلودار وزەن پورتى» اق. كومپانيا وكىلى سەرگەي جيتينيەۆتىڭ ايتۋىنشا، قايتا جاڭعىرتۋ جوسپارعا ساي ءجۇرىپ جاتىر، جوبانى اياقتاۋ 2026 جىلعا جوسپارلانعان.
جۇمىس اياسىندا ەسكى ءارى دەفورماسيالانعان گرانيت تاقتالارى الىنىپ، گيدرووقشاۋلاعىش قاباتى بار جاڭا تاقتالار ورناتىلادى. جيەكتاستار جاڭارىپ،جۇرگىنشى جانە تەحنيكالىق جولدار اباتتاندىرىلادى. گيدراۆليكالىق سىناقتاردان كەيىن انىقتالعان اقاۋلار جويىلىپ، تەگىستەۋ قاباتى توسەلەدى.
سونداي-اق، جاسىل جەلەكتى اۆتوسۋارۋ ءۇشىن سورعى ستانسياسى ورناتىلادى. وزەن بويىنا اعاشتاردى جاپپاي ەگۋ 2026 جىلى كوكتەمگە جوسپارلانعان. جوباعا جارامسىز قورشاۋلاردى الىپ تاستاۋ جانە جاڭارتۋ، سونداي-اق كوپىرلەردى جوندەۋ جۇمىستارى – تازالاۋ، گرۋنتتاۋ جانە بوياۋ كىرەدى.
«بارلىق جۇمىس جوسپارعا سايكەس ورىندالىپ جاتىر. قاجەت بولعان جاعدايدا، تۇرعىنداردىڭ ءوتىنىشى بويىنشا قوسىمشا ءتۇسۋ جانە كوتەرىلۋ جولدارىن قاراستىرۋعا دايىنبىز»، – دەدى مەردىگەر ۇيىم وكىلى.