الماتىدا ورتالىق قالالىق كلينيكالىق اۋرۋحانانىڭ دارىگەرلەرى مەديسيناداعى ەڭ ءقاۋىپتى جاعدايلاردىڭ ءبىرى — قۇرساق اورتاسىنىڭ انيەۆريزماسى جارىلعان ناۋقاستىڭ ءومىرىن ساقتاپ قالدى.
پاسيەنت قابىلداۋ بولىمىنە اۋىر جاعدايدا جەتكىزىلدى. ونى بەل مەن ءىش ايماعىنداعى قاتتى اۋىرسىنۋلار مازالاپ، السىزدىك پەن ءوڭىنىڭ بوزارۋى بايقالدى.
پروفەسسور سەرىك تۇرسىنبايەۆ پەن قان تامىر حيرۋرگياسى ءبولىمىنىڭ مەڭگەرۋشىسى راحمان ساپاربايەۆتىڭ بىرلەسكەن تەكسەرۋىنىڭ ناتيجەسىندە بىردەن دياگنوز قويىلدى: قۇرساق اورتاسىنىڭ انيەۆريزماسى جارىلۋى.
بۇل جاعداي كوبىنە قايعىلى اياقتالادى. مەديسينالىق ستاتيستيكاعا سايكەس، مۇنداي ناۋقاستاردىڭ 90%-ى اۋرۋحاناعا جەتپەي كوز جۇمادى، ال جەدەل وپەراسيا جاسالعانداردىڭ تەك 10–20%-ى عانا امان قالادى.
ساناۋلى مينۋتتار ىشىندە انەستەزيولوگتار يگور كيمنىڭ جەتەكشىلىگىمەن ناۋقاستى وپەراسياعا دايىندادى. كەيىن قان تامىر حيرۋرگتارىنىڭ بريگاداسى اسا كۇردەلى وپەراسيا — انيەۆريزمانى رەزەكسيالاۋ جانە اورتانى پروتەزدەۋدى ءساتتى جۇزەگە اسىردى.
اراعا ەكى كۇن سالىپ ناۋقاستىڭ جاعدايى تۇراقتالىپ، ول جانساقتاۋ بولىمىنەن جالپى پالاتاعا اۋىستىرىلدى. بۇگىندە ول وزدىگىنەن قوزعالىپ، ۇيىنە شىعارۋعا دايىندالۋدا.
دارىگەرلەردىڭ ايتۋىنشا، بۇل جاعداي — سيرەك كەزدەسەتىن ساتتىلىك.
انيەۆريزمانىڭ الدىن الۋدىڭ ەڭ ءتيىمدى جولى — ونى دەر كەزىندە انىقتاۋ.
65 جاستان اسقان ەر ادامدارعا، اسىرەسە تەمەكى شەگەتىندەرگە، اۋرۋ ءقاۋپىن جوققا شىعارۋ ءۇشىن قۇرساق قۋىسىنىڭ ءۋدز-ىن ءبىر رەت وتكىزۋ جەتكىلىكتى.
سونداي-اق تەمەكىدەن باس تارتۋ جانە قان قىسىمىن باقىلاۋدا ۇستاۋ انيەۆريزما دامۋىنىڭ ىقتيمالدىعىن ايتارلىقتاي تومەندەتەدى. ال ەگەر انيەۆريزما انىقتالسا، قان تامىر حيرۋرگىنىڭ تۇراقتى باقىلاۋىندا بولۋ جوسپارلى وپەراسيا جاساۋعا مۇمكىندىك بەرەدى. بۇل — شۇعىل وپەراسياعا قاراعاندا ونداعان ەسە ءقاۋىپسىز.
پاسيەنت وزىنە ەكىنشى ءومىر سىيلاعان كاسىبي شەبەرلىگى، ۇيلەسىمدى ىس-ارەكەتى جانە جانقيارلىق ەڭبەگى ءۇشىن ورتالىق قالالىق كلينيكالىق اۋرۋحانا ۇجىمىنا شىنايى العىسىن ءبىلدىردى.