الماتى اكىمى دارحان ساتىبالدى كورەيا رەسپۋبليكاسىنىڭ كونسان-نامدو پروۆينسياسىنىڭ گۋبەرناتورى پاك ۆان سۋمەن رەسمي كەزدەسۋ وتكىزدى. كەزدەسۋ بارىسىندا تاراپتار ءۇش نەگىزگى مەموراندۋمعا قول قويدى. اتاپ ايتقاندا، الماتى مەن كونسان-نامدو اراسىنداعى سەرىكتەستىك پەن تاجىريبە الماسۋ، جەدەل ساتى سالاسىن بىرلەسە دامىتۋ جانە شەتەلدىك ستۋدەنتتەردى تارتۋ ماسەلەلەرى بويىنشا ۋاعدالاستىق جاسالدى. بۇل قۇجاتتار ىسكەرلىك قارىم-قاتىناستى بەكەمدەۋگە، جوعارى تەحنولوگيا مەن ءبىلىم بەرۋ سالاسىندا ورتاق جوبالاردى جۇزەگە اسىرۋعا جانە تاجىريبە الماسۋعا جول اشادى.
دارحان ساتىبالدى ءبىلىم بەرۋ باعىتىنداعى ارىپتەستىكتىڭ ەرەكشە ماڭىزى بار ەكەنىن اتاپ ءوتتى. ونىڭ ايتۋىنشا، وڭتۇستىك كورەيا ازيا-تىنىق مۇحيتى وڭىرىندە ءبىلىم بەرۋ سالاسىنىڭ كوشباسشىسى سانالادى. بىلتىر شەتەلدىك ستۋدەنتتەر ءۇشىن ەڭ قولايلى مەملەكەتتەردىڭ ءبىرى دەپ تانىلعان.
«ءبىز ءبىلىم سالاسىنداعى بايلانىستى نىعايتۋعا مۇددەلىمىز. ءسىزدىڭ دەلەگاسياڭىزبەن بىرگە چانۆون ۋنيۆەرسيتەتى مەن كورەيا جەدەل ساتى يندۋسترياسى ۋنيۆەرسيتەتىنىڭ رەكتورلارىنىڭ كەلۋى وسى باعىتتىڭ ماڭىزىن ايعاقتايدى. اسىرەسە، ينجەنەرلىك-تەحنيكالىق جانە IT سالالارى ءبىز ءۇشىن اسا ماڭىزدى. بۇل ماماندىقتار الماتى مەن قازاقستان ەكونوميكاسىن دامىتۋدا ستراتەگيالىق مانگە يە»، – دەدى قالا باسشىسى.
اكىم سونداي-اق، الماتى مەن وڭتۇستىك كورەيا اراسىنداعى بايلانىستىڭ قارقىندى دامىپ كەلە جاتقانىن ايتتى. 2025 جىلدىڭ العاشقى جارتىسىندا شاھارعا كورەيا رەسپۋبليكاسىنان 10 مىڭنان استام تۋريست كەلگەن.
ءوز كەزەگىندە گۋبەرناتور پاك ۆان سۋ كونسان-نامدو پروۆينسياسىنىڭ الماتىمەن ءوزارا ىنتىماقتاستىقتى كەڭەيتۋگە نيەتتى ەكەنىن جەتكىزدى. اسىرەسە، جەدەل ساتى ءوندىرىسىن وركەندەتۋ جانە ەركىن ەكونوميكالىق ايماق اياسىندا بىرلەسكەن جوبالاردى جۇزەگە اسىرۋعا باسىمدىق بەرىلەتىنىن اتادى. ول قول قويىلعان مەموراندۋمدار كورەيا مەن قازاقستان اراسىنداعى ۇزاق مەرزىمدى سەرىكتەستىكتىڭ بەرىك ىرگەتاسىنا اينالىپ، جاڭا تەحنولوگيا الماسۋعا، ينۆەستيسيا تارتۋعا جانە يننوۆاسيالىق باستامالاردى جۇزەگە اسىرۋعا سەرپىن بەرەتىنىنە سەنىم ءبىلدىردى.