الماتى ءوزىنىڭ تۋعان كۇنىن ەرەكشە تۇردە اتاپ ءوتتى: ءتۇرلى ءىس-شارالار مەن مەرەكەلىك كوڭىل-كۇيدەن بولەك، قالا – جاڭا تۇرعىندارمەن تولىعىپ، ۇلكەن سىيلىققا يە بولدى.
21 قىركۇيەكتە الماتىنىڭ پەرزەنتحانالارىندا 69 ءسابي دۇنيەگە كەلدى، ونىڭ 32ء-سى ۇل بالا جانە 37ء-سى قىز بارا.
ونداعان وتباسىلاردىڭ شاڭىراعىندا بۇل كۇن ەرەكشە ماڭىزعا يە بولىپ، ەكى دۇركىن مەرەكەمەن اتالىپ ءوتتى: ءبىرىنشىسى – سۇيىكتى قالانىڭ تۋعان كۇنى، ەكىنشىسى –بالالارىنىڭ ومىرگە كەلۋى.
«ەندى بۇل مەرەكە ءبىزدىڭ وتباسىمىز ءۇشىن – ەڭ ماڭىزدى داتا بولماق. قىزىمىزدىڭ تۋعان كۇنىن الماتىلىقتاردىڭ بارلىعىمەن بىرگە اتاپ وتەتىن بولامىز»، - دەيدى جاس انا.
قالانىڭ قوعامدىق دەنساۋلىق ساقتاۋ باسقارماسى ومىرگە كەلگەن بارلىق سابيلەر مەن ولاردىڭ انالارى ءقازىر وزدەرىن جاقسى سەزىنىپ وتىرعانىن حابارلادى.
قالا كۇنى قارساڭىندا قالالىق پەريناتالدىق ورتالىقتا سيرەك كەزدەسەتىن جانە قۋانىشتى وقيعا ورىن الدى –دۇنيەگە ۇشەم كەلدى.
سالماعى 1968 گرامم جانە بويى 42 سم ۇل، سالماعى 1648 گرامم جانە بويى 40 سم قىز، سالماعى 1699 گرامم جانە بويى 41 سم بولاتىن تاعى ءبىر قىز ومىرگە كەلدى. وتباسى «اڭساعان ءسابي» ەكۇ مەملەكەتتىك قولداۋ باعدارلاماسىنا جۇگىنگەن.
مەديسينالىق كورسەتكىشتەر بويىنشا بوسانۋ 32ء-شى اپتادا شۇعىل تۇردە جۇرگىزىلدى. سابيلەردىڭ اناسى 30 جاستا.
وتا ەرتە تاڭدا، ساعات تورتتە بولعانىنا قاراماستان، پەريناتالدىق ورتالىقتىڭ بىلىكتى ماماندار توبى جەدەل جۇمىلدىرىلدى. دارىگەرلەردىڭ ۇيلەسىمدى جۇمىسىنىڭ ارقاسىندا كەسىر تىلىگى ءساتتى ءوتتى. سابيلەر بىردەن جاڭا تۋعان نارەستەلەردىڭ جانساقتاۋ بولىمىندە كومەك الدى، سودان كەيىن پاتولوگيا بولىمىنە اۋىستىرىلدى.
قالا كۇنىنە 69 ءسابي مەن مەرەكەنىڭ قارسى الدىندا ۇشەمنىڭ دۇنيەگە كەلۋى –وتباسىلار ءۇشىن قۋانىشتى وقيعا عانا ەمەس. بۇل الماتى – بولاشاقتىڭ قالاسى ەكەنىن ەسكە سالادى. ءاربىر جاڭا بالا – جاڭا ءۇمىت، ال بالالاردىڭ بارلىعى بىرگە – بۇل قالا تاريحىن قۇراتىن جانە جالعاستىراتىن بولاشاق ۇرپاق.