الماتىدا وتەتىن "قايرات" - "رەال مادريد" ويىنىنا بيلەتتەر باعاسى الەۋمەتتىك جەلىلەردە قىزۋ تالقىعا ءتۇستى. كوپشىلىك قۇنى 30 مىڭنان 250 مىڭ تەڭگەگە دەيىن باراتىن بيلەتتەردى قىمباتسىنىپ جاتىر. بۇل باعانى ەۋروپاداعى كلۋبتاردىڭ بيلەت باعاسىمەن سالىستىرساق ايىرماشىلىق بار ما؟ اqshamnews.kz ماتەريالىنان ءبىلىڭىز.
15 قىركۇيەكتە "قايرات" فۋتبول كلۋبىنىڭ رەسمي سايتىندا UEFA چەمپيوندار ليگاسىنىڭ ويىندارىنا ارنالعان بيلەتتىڭ باعاسىنا قاتىستى اقپارات جاريالاندى. اقپاراتقا ساي، "قايرات – Real Madrid" ويىنىنىڭ بيلەتى 23 قىركۇيەكتە ساتىلىمعا شىعادى. بيلەتتى تەك كلۋبتىڭ رەسمي سايتىنان جانە Ticketon پلاتفورماسىنان الۋعا بولادى: قۇنى 30 000 – 250 000 تەڭگە اراسىندا.
وسىدان كەيىن الەۋمەتتىك جەلىلەردە بيلەتتىڭ قۇنىنا نارازى جۇرتتىڭ قاراسى كوبەيىپ، ءتۇرلى پوست تاراي باستادى. سونىڭ ىشىندە جۋرناليست سىرىم يتقۇلوۆ Telegram ارناسىندا "قايراتتىڭ" ماچتارىنداعى بيلەت قۇنىن سىنعا الىپ، ەۋروپاداعى كەيبىر فۋتبول كلۋبتاردىڭ باعاسىمەن سالىستىرىپ كوردى. ونىڭ ايتۋىنشا، ميلانداعى San Siro ستاديونىندا بيلەت قۇنى €16 (≈ 8 500 تگ)، لوندونداعى Tottenham Hotspur Stadium-دا £30 (≈ 15 000 تگ) بولسا، مادريدتەگى Wanda Metropolitano-دا €35 (≈ 16 000 تگ) دەيدى. سونداي-اق، قايراتتىڭ الماتىداعى 4 ماچقا ارنالعان پاكەتىنىڭ قۇنى ءتىپتى 1 ملن-عا دەيىن باراتىنىن اتاپ ءوتتى.
Factcheck.kz وسى تۇستا ەۋروپاداعى كلۋبتاردىڭ كەيبىرىنە شولۋ جاساپ، بيلەت قۇنىن انىقتاپ، سالىستىرىپ كوردى.
"قايرات" فك قارسىلاستارىنىڭ بيلەت قۇنىنا ۇڭىلسەك...
28 تامىزدا UEFA چەمپيوندار ليگاسى جالپى كەزەڭىندەگى 36 كوماندا اراسىندا جەرەبە جاسالدى. جەرەبەدە قايراتتىڭ ءوز الاڭىنداعى جانە سىرت الاڭداعى قارسىلاستارى انىقتالدى. الماتىعا يسپانيالىق Real Madrid، كيپرلىق Pafos، گرەكيالىق Olympiakos جانە بەلگيالىق Club Brugge كەلەتىن بولسا، سىرت الاڭدا انگليالىق Arsenal، يتالياندىق Inter، پورتۋگالدىق Sporting جانە دانيالىق Copenhagen-گە قوناققا بارادى. ەندى ءار كوماندانىڭ چەمپيوندار ليگاسى اياسىنداعى ءوز الاڭىندا وتكىزەتىن ەڭ العاشقى ويىنىنىڭ بيلەت باعاسىن جانە "قايرات – Real Madrid" اراسىنداعى ويىننىڭ بيلەت قۇنىن ەۋروعا اينالدىرىپ، سالىستىرىپ كوردىك.
- Kairat: شامامەن €46 – €390 ەۋرو اراسى؛
- Real Madrid: €90 – €590 ەۋرو اراسى؛
- Olympiakos: €40 – €350 ەۋرو اراسى؛
- Pafos: €20 – €330 ەۋرو اراسى؛
- Club Brugge: €175 – €380 اراسى؛
- Arsenal: £44.80 – £84.00 (≈ €51 – €97) اراسى؛
- Inter: €21 – €350 ەۋرو اراسى؛
- Sporting: €20 – €88 اراسى؛
- Copenhagen: 500 – 1750 دات كرونى (≈ €67 – €235).
قايراتتىڭ قارسىلاستارى اراسىندا ەڭ ارزان بيلەت €20 ەۋرودان باستالسا، ەڭ قىمباتى €590 ەۋروعا دەيىن بارادى. تەڭگەگە شاققاندا شامامەن 13 000 مەن 378 000 اراسىندا بولادى.
چل-عا العاش قاتىسىپ وتىرعان كلۋبتاردىڭ بيلەت قۇنى قانشا؟
بيىلعى ماۋسىمدا "قايرات" فۋتبول كلۋبىنان بولەك تاعى 3 كوماندا نەگىزگى كەزەڭگە العاش رەت شىعىپ وتىر. ولار: كيپرلىق Pafos، نورۆەگيالىق Bodø/Glimt جانە بەلگيالىق Union Saint-Gilloise. بۇل كلۋبتاردىڭ دا بيلەت قۇنىن قايراتتىڭ ماچىنداعى بيلەت باعاسىمەن سالىستىرىپ كوردىك.
- Kairat: شامامەن €46 – €390 ەۋرو اراسى؛
- Bodø/Glimt: 300 – 450 نورۆەگ كرونى (≈ €26 – €39) اراسى؛
- Union Saint-Gilloise: €32 – €112،5 ەۋرو اراسى؛
- Pafos: €20 – €330 ەۋرو اراسى.
العاش شىققان كوماندالار اراسىنداعى ەڭ ارزان بيلەت €20 بولسا، ەڭ قىمباتى €330 ەۋرو. تەڭگەگە شاققاندا شامامەن 13 000 مەن 210 000 اراسىندا بولادى.
بيلەتتەردىڭ قۇنىنا قاتىستى UEFA-دا قانداي دا ءبىر تالاپ بار ما؟
ەۋروپا فۋتبول قاۋىمداستىعىنىڭ وداعىندا كلۋب اراسىندا بيلەتتەردىڭ قۇنىنا قاتىستى ناقتى ءبىر تالاپ جوق. تەك قوناق جانكۇيەرلەرگە، ياعني قارسىلاس كوماندانىڭ قولداۋشىلارىنا ارنالعان سەكتورلاردا بيلەت قۇنى چەمپيوندار ليگاسىندا €50 ەۋرو، ەۋروپا ليگاسىندا €35 ەۋرو جانە كونفەرەنسيا ليگاسىندا €20 ەۋرودان اسپاۋ كەرەك. سول ءۇشىن دە ءوز الاڭىندا ماچ وتكىزەتىن كوماندا ستاديون سىيىمدىلىعىنىڭ 5%-ىن قارسىلاس كوماندانىڭ جانكۇيەرلەرىنە بولۋگە ءتيىس. ياعني، UEFA ەڭ باستىسى – قوناق جانكۇيەرلەر ءۇشىن بيلەتتىڭ قولجەتىمدى بولۋىن مىندەتتەيدى.
Factcheck.kz رەداكسياسى "قايرات»"فۋتبول كلۋبىنىڭ قارسىلاستارى اراسىنداعى جانە جالپى كەزەڭگە ەڭ العاش شىققان كوماندالاردىڭ بيلەت باعاسىنا شولۋ جاسادى. شولۋ بارىسىندا ەڭ ارزان بيلەتتەر 13 مىڭنان (€20) باستالسا، ەڭ قىمباتى ءارى VIP سەكتورلاردا 378 مىڭعا (€590) دەيىن بارادى. ال قايراتتىڭ الماتىداعى ەڭ العاشقى ويىنىنىڭ بيلەت قۇنى 30 000 – 250 000 تەڭگە ەكەنىن ەسكەرسەك، ەۋروپاداعى ماچتاردىڭ باعاسىمەن سالىستىرعاندا كوپ ايىرماشىلىقتى بايقالمايدى. دەگەنمەن ءار ەلدىڭ ورتاشا جالاقى مولشەرى، جان باسىنا شاققانداعى ءجىو جانە ءومىر ءسۇرۋ دەڭگەيىنىڭ ءارتۇرلى ەكەنىن ايتا كەتكەنىمىز ءجون.