الماتىدا ءىىم ماقان ەسبولاتوۆ اتىنداعى اكادەميادا "قىزمەتتىك يدەولوگيا: ءتارتىپ، بىرلىك، تۇتاستىق" اتتى عىلىمي-تاجىريبەلىك كونفەرەنسيا ءوتتى.
بۇل كونفەرەنسيانىڭ ەرەكشەلىگى – پوليسيا قىزمەتىمەن تىكەلەي بايلانىستى ءتۇرلى سالا ماماندارىنىڭ قاتىسۋى بولدى. اتاپ ايتقاندا، جۋرناليستەر، بلوگەرلەر، قوعامدىق ۇيىمدار مەن ەرىكتىلەر قوزعالىسىنىڭ وكىلدەرى، سونداي-اق حالىقپەن كۇن سايىن جۇمىس ىستەيتىن پوليسيا قىزمەتكەرلەرى ءبىر ورتاعا جينالدى. ولاردىڭ ءبارى دە ءبىر ماسەلە – پوليسياداعى يدەولوگيا مەن يميدج توڭىرەگىندە وي قوزعادى.
جيىنعا سونداي-اق ءىىم وكىلدەرى، پوليسيا دەپارتامەنتتەرى مەن ءىىم الماتى اكادەمياسىنىڭ باسشىلارى مەن ماماندارى، قاتىستى.
باستى نازار كاسىبي ەتيكا مەن پوليسيانىڭ بولاشاق بەينەسىن ايقىندايتىن قۇندىلىقتارعا اۋدارىلدى. ماسەلەن، ءتارتىپتى قالاي قالىپتاستىرۋعا بولادى، ورتاق قىزمەتتىك رۋحتى قالاي دامىتۋ قاجەت جانە قوعامعا پوليسيانىڭ اشىق ءارى ديالوگقا دايىن ەكەندىگىن قالاي جەتكىزۋ كەرەك دەگەن سۇراقتار تالقىلاندى.
كونفەرەنسيا بارىسىندا قىزمەتتىك جاۋاپكەرشىلىك، ازاماتتارمەن ءوزارا ارەكەتتەستىك، سونداي-اق پوليسياعا دەگەن سەنىمدى قالىپتاستىرۋداعى بۇقارالىق اقپارات قۇرالدارىنىڭ ءرولى قىزۋ تالقىلاندى.
قاتىسۋشىلاردىڭ ايتۋىنشا، بۇگىنگى پوليسيا جابىق كۇيدە جۇمىس ىستەي المايدى، اشىقتىق پەن تۇراقتى كەرى بايلانىس قاجەت.
وتىرىستا ءىىم وكىلدەرى اتاپ وتكەندەي، مينيسترلىك اشىقتىق تاجىريبەسىن بەلسەندى دامىتىپ كەلەدى. ازاماتتارمەن جۇزدەگەن كەزدەسۋلەر، ءتۇرلى جوبالار، ۋچاسكەلىك پۋنكتتەردىڭ نىعايۋى، قوعامدىق كەڭەستەردىڭ جۇمىسى، سەرۆيستىك پوليسيا ورتالىقتارىنىڭ اشىلۋى – مۇنىڭ بارلىعى پوليسيانىڭ قوعامعا جاقىنداپ، ديالوگقا دايىن ەكەنىن كورسەتەدى. بۇگىندە ءار وڭىردە حالىقپەن ەركىن پىكىر الماسۋعا ارنالعان الاڭدار جۇمىس ىستەپ تۇر.
"بۇگىنگى كونفەرەنسيانىڭ ماڭىزى زور. ويتكەنى مۇندا جۇيە ماماندارى دا، قوعام وكىلدەرى دە، جۋرناليستەر دە ءبىر زالدا باس قوستى. وسىنداي اشىق اڭگىمە بىزگە ءبىر-بىرىمىزدى جاقسىراق تۇسىنۋگە جانە دامۋ جولدارىن بىرگە ىزدەۋگە مۇمكىندىك بەرەدى"، – دەپ اتاپ ءوتتى اكادەميا باستىعىنىڭ ورىنباسارى، پوليسيا پولكوۆنيگى جانات ديلبارحانوۆا.
جيىن رەسمي باياندامالارمەن عانا شەكتەلمەي، تاجىريبەدەن الىنعان ناقتى مىسالدار مەن ۇسىنىستاردى تالقىلاۋمەن ەرەكشەلەندى. قاتىسۋشىلاردىڭ پىكىرىنشە، وسىنداي اشىق الاڭدار پوليسيا مەن قوعامنىڭ ءبىر تىلدە سويلەسۋىنە جانە ورتاق ماقسات – قاۋىپسىزدىك پەن سەنىمگە بىرگە قادام باسۋىنا جول اشادى.