الماتىدا پوليسيا قارۋى بار 8 مىڭنان اسا ادامدى تەكسەردى، - دەپ حابارلايدى اqshamnews.kz ءتىلشىسى Polisia.kz-كە سىلتەمە جاساپ.
1 قىركۇيەكتەن 1 قاراشاعا دەيىن الماتى قالاسىندا “ۋچاسكە” جەدەل-پروفيلاكتيكالىق ءىس-شاراسى وتكىزىلۋدە. ونىڭ اياسىندا قالالىق پوليسيا دەپارتامەنتىنىڭ قىزمەتكەرلەرى ازاماتتىق جانە قىزمەتتىك قارۋلاردىڭ ساقتالۋ جاعدايىن تەكسەرىپ جاتىر.
ءىس-شارا باستالعالى بەرى 8603 قارۋ يەسى تەكسەرىلدى. تەكسەرۋ بارىسىندا قارۋدى ساقتاۋ، سونداي-اق ونى تىركەۋ مەن قايتا تىركەۋ مەرزىمدەرىن بۇزۋ بويىنشا 185-تەن اسا قۇقىقبۇزۋشىلىق انىقتالدى. بارلىق قۇقىقبۇزۋشى قولدانىستاعى زاڭناماعا سايكەس جاۋاپكەرشىلىككە تارتىلدى.
"ءبىز بارلىق قارۋ يەلەرىن ازاماتتىق جانە قىزمەتتىك قارۋ اينالىمى سالاسىنداعى زاڭ تالاپتارىن قاتاڭ ساقتاۋعا، رۇقسات بەرۋ قۇجاتتارىنىڭ قولدانىلۋ مەرزىمدەرىن باقىلاۋعا جانە قارۋدى تۇرعىلىقتى جەردە ساقتاۋ ەرەجەلەرىن بۇلجىتپاي ورىنداۋعا شاقىرامىز. بۇل — ءار ازاماتتىڭ جانە جالپى قوعامنىڭ قاۋىپسىزدىگىنىڭ نەگىزى"، — دەدى الماتى قالالىق پد اكىمشىلىك پوليسيا باسقارماسىنىڭ باستىعى اسحات كۇلبايەۆ.