20 قىركۇيەكتە استانا قالاسىنداعى سارايشىق اۋدانىندا جۇمىسشى ماماندىقتار جىلى اياسىندا جاڭا سكۆەر – جۇمىسشى ماماندىقتار اللەياسى اشىلدى. بۇل الاڭ ەڭبەك ادامدارىنا دەگەن قۇرمەتتىڭ، سونداي-اق جۇمىسشى كاسىپتەردىڭ ەل دامۋىنا قوسقان ۇلەسىنىڭ سيمۆولىنا اينالدى.
سالتاناتتى ءىس-شاراعا قالا تۇرعىندارى، ءتۇرلى سالا ماماندارى، قوعام بەلسەندىلەرى مەن دەپۋتاتتار قاتىستى. سارايشىق اۋدانى اكىمى ماقسات سامات ۇلىنىڭ ايتۋىنشا، بۇل باستاما مەملەكەت باسشىسىنىڭ 2025 جىلدى جۇمىسشى ماماندىقتار جىلى دەپ جاريالاۋىنا وراي جۇزەگە اسىرىلعان.
مەرەكەلىك شارانىڭ جارقىن ساتتەرىنىڭ ءبىرى – ارنايى مۋرالدىڭ اشىلۋى بولدى. وندا ءتۇرلى جۇمىسشى ماماندىق يەلەرى بەينەلەنگەن.سكۆەردى اباتتاندىرۋ جۇمىستارى 3 اي بويى جۇرگىزىلىپ، اشىلۋ كۇنى تولىق اياقتالدى. جوبالاۋ بارىسىندا اۋدان تۇرعىندارىنىڭ ۇسىنىستارى ەسكەرىلىپ، اللەيا جەرگىلىكتى حالىقپەن بىرلەسە وتىرىپ جاساقتالدى.
شارا بارىسىندا 400-دەن استام قىلقان جاپىراقتى اعاش وتىرعىزىلدى.
– جەرگىلىكتى تۇرعىندار ءدال وسى جەردە سكۆەر بولسا ەكەن دەپ تىلەدى. ءبىز سول ارماندى ىسكە اسىردىق. ەندى بۇل ورىن قالا تۇرعىندارىنىڭ سۇيىكتى دەمالىس ورنىنا اينالاتىنىنا سەنەمىن، – دەدى ماقسات سامات ۇلى.
اللەيا – ەڭبەككە قۇرمەتتىڭ بەلگىسى، جۇمىسشى كاسىپتەردى دارىپتەيتىن مادەني جانە الەۋمەتتىك ءىس-شارالار وتەتىن الاڭ بولادى. سونىمەن قاتار، شارا بارىسىندا «ەڭبەك جولى» بايقاۋىنىڭ جەڭىمپازدارى دا ماراپاتتالىپ، ەڭبەك سالاسىنىڭ ۇزدىكتەرى لايىقتى باعاسىن الدى.