نۇرعيسا تىلەندييەۆتىڭ مەموريالدىق مۋزەيىندە قازاق رۋحانياتى ءۇشىن ايرىقشا ءمانى بار ادەبي-سازدى كەش ءوتتى. «تالانت تابىستىرعان تاعدىرلار» دەپ اتالعان بۇل تاعىلىمدى شارادا قازاق پوەزياسىنىڭ مۇزبالاعى مۇقاعالي ماقاتايەۆتىڭ جىر الەمى مەن ۇلت مۋزىكاسىنىڭ زاڭعار تۇلعاسى نۇرعيسا تىلەندييەۆتىڭ سازدى مۇراسى ءبىر ارنادا توعىستى.
كەشتىڭ باستى ەرەكشەلىگى – پوەزيا مەن مۋزىكانىڭ تابيعي ۇيلەسىمىن كورەرمەنگە تەرەڭ سەزىندىرە بىلۋىندە بولدى. ساحنا تورىندە نۇرعيسا تىلەندييەۆ اتىنداعى «وتىرار سازى» اكادەميالىق فولكلورلى-ەتنوگرافيالىق وركەسترى ونەر كورسەتىپ، قازاقتىڭ ءتول اۋەزىن اسقاقتاتا ورىندادى. وركەستردىڭ قوڭىر ءۇنى مۇقاعالي جىرلارىنىڭ ىشكى فيلوسوفياسىن، جان تەربەتەر سىرىن ايرىقشا اشىپ، كورەرمەندى ەرەكشە رۋحاني كۇيگە بولەدى.
ادەبي-سازدى كەش بارىسىندا بەلگىلى ونەر يەلەرى – ساۋلە جانپەيىسوۆا، ەركىن قۇدايبەرگەن جانە مەيىربەك ازىمبايەۆ اقىن ولەڭدەرىنە جازىلعان اندەردى ورىنداپ، مۇقاعالي پوەزياسىن جاڭا قىرىنان تانىتتى. ءان مەن جىردىڭ توعىسۋى، جۇرەكتەن شىققان ءسوز بەن شىنايى اۋەن كورەرمەنگە تەرەڭ اسەر قالدىرىپ، كەشكە قاتىسقان قاۋىمدى ءبىر ساتكە ۋاقىت پەن كەڭىستىكتەن تىس رۋحاني الەمگە جەتەلەدى.
كەش مازمۇنىن بايىتا تۇسكەن تاعى ءبىر ماڭىزدى ءسات – بولتىرىك اتىحان ۇلى اتىنداعى №36 گيمنازيا وقۋشىلارىنىڭ ونەرى بولدى. جاس ورەندەر مۇقاعالي ماقاتايەۆتىڭ ولەڭدەرىن مانەرلەپ وقىپ، پوەزياعا دەگەن شىنايى قۇرمەت پەن سۇيىسپەنشىلىكتى ايقىن كورسەتتى. ولاردىڭ تازا دا اسەرلى وقۋى اقىن جىرلارىنىڭ ماڭگىلىك ەكەنىن، جاس ۇرپاقتىڭ جۇرەگىنەن دە ورىن الاتىنىن اڭعارتتى.
«تالانت تابىستىرعان تاعدىرلار» اتتى بۇل ادەبي-سازدى كەش – تەك ءبىر كەشتىك مادەني شارا ەمەس، قازاق ادەبيەتى مەن مۋزىكاسىنىڭ ءوزارا بايلانىسىن، رۋحاني ساباقتاستىعىن تانىتقان تاعىلىمدى كەزدەسۋ بولدى. مۇقاعالي ماقاتايەۆتىڭ جۇرەكتەن شىققان جىرلارى مەن نۇرعيسا تىلەندييەۆتىڭ عاجايىپ سازدارى ارقىلى ۇلتتىق ونەردىڭ قۇدىرەتى تاعى ءبىر مارتە ايقىندالىپ، كورەرمەننىڭ كوڭىلىندە ۇزاق ساقتالاتىن رۋحاني اسەر قالدىردى.