الماتى اكىمىنىڭ ورىنباسارى الماسحان سماتلايەۆ الماتى قالاسى توتەنشە جاعدايلار دەپارتامەنتىنىڭ ءورت ءسوندىرۋ-قۇتقارۋ بولىمشەسىنە باردى. ول جەدەل قىزمەتتىڭ جۇمىسىمەن، تەحنيكالىق جاراقتاندىرۋ دەڭگەيىمەن جانە ازاماتتىق قورعاۋ جۇيەسىن جاڭعىرتۋ بارىسىمەن تانىستى.
اتالعان ساپار مەملەكەت باسشىسىنىڭ تاپسىرمالارىن ورىنداۋ اياسىندا ءوتتى. سوعان سايكەس، قالا ينفراقۇرىلىمىن دامىتۋدا ازاماتتار مەن تۋريستەردىڭ قاۋىپسىزدىگىن قامتاماسىز ەتۋ باسىمدىق بولىپ قالا بەرەدى.
«اكىمدىكتىڭ قولداۋىمەن الدىن الۋ شارالارى قابىلدانىپ، كۇشتەر مەن قۇرالداردىڭ تۇراقتى دايىندىعى قامتاماسىز ەتىلەدى، ونىڭ ىشىندە سۋ تاسقىنى كەزەڭىنە دايىندىق تا بار. جۇيەلى پروفيلاكتيكالىق جۇمىس پەن ماتەريالدىق-تەحنيكالىق بازانى جاڭارتۋ جەدەل ارەكەت ەتۋ تيىمدىلىگىن ارتتىرىپ، تۇرعىنداردىڭ قورعالۋ دەڭگەيىن كۇشەيتۋگە مۇمكىندىك بەرەدى»، – دەدى الماتى اكىمىنىڭ ورىنباسارى الماسحان سماتلايەۆ.
بۇگىندە الماتىنىڭ تجد گارنيزونى رەسپۋبليكا بويىنشا ەڭ جاقسى جاراقتاندىرىلعان بولىمشەلەردىڭ ءبىرى سانالادى. جاراقتاندىرىلۋ دەڭگەيى 97%-عا جەتەدى. قۇتقارۋشىلاردىڭ يەلىگىندە 160-تان استام تەحنيكا بىرلىگى بار. 2025 جىلى جەرگىلىكتى بيۋدجەت ەسەبىنەن دەپارتامەنتكە 33 بىرلىك زاماناۋي تەحنيكا جەتكىزىلدى. ونىڭ ىشىندە اپاتتىق-قۇتقارۋ كولىكتەرى، ءورت ءسوندىرۋ اۆتوساتىلارى، رەانيموبيلدەر، اۆتوسيستەرنالار جانە ارنايى تەحنيكا بار.
الماتى قالاسى تجد باسشىسى دامير ەرماعامبەتوۆتىڭ ايتۋىنشا، 2025 جىلى الماتى قالاسىندا تجم قۇتقارۋ بولىمشەلەرى اپاتتىق-قۇتقارۋ جانە شۇعىل جۇمىستاردى جۇرگىزۋ ءۇشىن 17 مىڭنان استام شاقىرتۋعا شىققان، ونىڭ ىشىندە تاۋلى ايماقتارداعى جۇمىستار دا بار. توتەنشە جاعداي ايماقتارىنان شامامەن 1 مىڭ ادام قۇتقارىلىپ، ەۆاكۋاسيالانعان.
بيىل قاڭتاردا تاۋداعى قۇتقارۋ جۇمىسى بارىسىندا 18 تۋريست، ونىڭ ىشىندە شەتەل ازاماتتارى دا قۇتقارىلدى.
الماتىنىڭ ورتكە قارسى قورعانىسىن 22 ءورت ءسوندىرۋ بولىمشەسى قامتاماسىز ەتەدى. ينفراقۇرىلىمدى كەزەڭ-كەزەڭىمەن جاڭارتۋ اياسىندا ەكى ءورت ءسوندىرۋ دەپوسىنىڭ قۇرىلىسى اياقتالدى، اقپان ايىنىڭ سوڭىندا تاعى ەكى بولىمشە اشۋ جوسپارلانىپ وتىر. سونىمەن قاتار، شۇعىلا شاعىناۋدانىندا ءورت دەپوسى سالىنىپ جاتىر، «مەدەۋ» مەملەكەتتىك تابيعي پاركىنىڭ اۋماعىندا روسو قۇتقارۋ بەكەتى اشىلدى، ق ر ءتجم-نىڭ «الاتاۋ» وڭتۇستىك بازاسىن دامىتۋ جوسپارى ىسكە اسىرىلۋدا.
بۇعان قوسا، جەرگىلىكتى بيۋدجەت قاراجاتى ەسەبىنەن ءورت ءسوندىرۋ بولىمشەلەرىندە جوندەۋ جۇمىستارى جۇرگىزىلدى، 101 جانە 112 جەدەل بايلانىس جەلىلەرى جاڭعىرتىلدى، بەينەباقىلاۋ جانە ءورتتى ەرتە انىقتاۋ جۇيەلەرى ەنگىزىلدى، سونداي-اق جاڭا قۇتقارۋ جابدىقتارى ساتىپ الىندى.