بيىل الماتىداعى قىس جىلداعىعا قاراعاندا جايلى ءوتىپ جاتىر. قار دا ادەتتەگىدەي قالىڭ تۇسكەن جوق. قاڭتار ايىندا جاۋعان قاردىڭ ءوزى بۇل كۇندەرى ەرىپ، كوشەلەردە سيرەك اعاراڭداعان ىزدەرى عانا بايقالادى. كوكتەمنىڭ كەلۋىنە دە ءبىر ايدان از قالدى.
وسىعان بايلانىستى رەداكسيامىزعا قالا تۇرعىندارىنان جاڭا جىل مەرەكەسى قارساڭىندا ورناتىلعان شىرشالارعا قاتىستى سۇراقتار كەلىپ تۇسە باستادى. تۇرعىنداردىڭ ايتۋىنشا، شامامەن ءبىر جارىم اي بۇرىن قويىلعان شىرشالاردى جينايتىن ۋاقىت الدەقاشان جەتكەن.
بۇل ماسەلەگە قاتىستى ناقتى اقپارات الۋ ماقساتىندا الماتى قالاسى مادەنيەت باسقارماسىنىڭ باسپا ءسوز حاتشىسىمەن بايلانىسقا شىقتىق. ۆەدومستۆو وكىلى بۇل ساۋالىمىزعا قىسقاشا جاۋاپ بەردى.
"قالانىڭ باستى ورىندارى مەن الاڭدارىندا قويىلعان شىرشالاردى جيناۋ جۇمىستارى باستالىپ كەتتى. ءقازىر ولار كەزەڭ-كەزەڭىمەن الىنىپ جاتىر. اپتا باسىندا ءتيىستى تاپسىرما بەرىلدى"، - دەدى ول.
ال شىرشالاردى تولىق جيناۋ جۇمىستارى قانشا ۋاقىتقا سوزىلادى دەگەن ساۋالىمىزعا:
"جيناۋ جۇمىستارى ادەتتە بىرنەشە كۇنگە سوزىلادى. سوندىقتان ناقتى مەرزىمى بەلگىلەنبەگەن. كوبىنە باستالعان سوڭ 7-10 كۇننىڭ ىشىندە اياقتالادى"، - دەپ ءتۇسىندىردى ءتيىستى ورگان وكىلى.
ايتا كەتەيىك، رەسپۋبليكا سارايى الدىنداعى اباي الاڭىندا ورنالاسقان الماتىنىڭ باستى شىرشاسى 2025 جىلدىڭ 18 جەلتوقسانىندا جاعىلعان بولاتىن. ءقازىر بۇل شىرشا دا ءالى تولىق جينالىپ ۇلگەرمەگەن.
قالا تۇرعىنى جولداعان سۋرەت
قالا تۇرعىندارى مەرەكەلىك بەزەندىرۋلەردىڭ قاشان تولىق الىناتىنىن كۇتىپ وتىر. ال جاۋاپتى مەكەمەلەردىڭ مالىمەتىنشە، بارلىق شىرشا مەن بەزەندىرۋ ەلەمەنتى جاقىن كۇندەرى كەزەڭ-كەزەڭىمەن جينالىپ، قالانىڭ قوعامدىق كەڭىستىكتەرى قالىپتى كۇيگە كەلتىرىلەدى.
قالاداعى بارلىق سەگىز اۋدانىندا جاڭا جىلدىق شىرشالار ورناتىلعان. ولاردىڭ مەكەنجايلارى:
- جەتىسۋ اۋدانى – «گۇلدەر» ساياباعى (سەرىكوۆ كوشەسى، 2ا)؛
- بوستاندىق اۋدانى – «اتاكەنت» كىىو؛
- اۋەزوۆ اۋدانى – «Family Park»؛
- مەدەۋ اۋدانى – «28 گۆاردياشى-پانفيلوۆشىلار اتىنداعى ساياباق»؛
- الاتاۋ اۋدانى – «الماتى ارەنا» سپورت كەشەنى؛
- ناۋرىزباي اۋدانى – شۇعىلا شاعىناۋدانى، 347 (امفيتەاتر)؛
- تۇركسىب اۋدانى – №6 وقۋشىلار ءۇيى (سەيفۋللين كوشەسى، 13/1)؛
- المالى اۋدانى – اباي اتىنداعى وپەرا جانە بالەت تەاترى الاڭى.