الماتى قالاسىنىڭ وڭىرلىك كوممۋنيكاسيالار قىزمەتىندە «الماتىنى سيفرلاندىرۋ: 2026 جىلعا ارنالعان جاڭا جوبالار مەن باستامالار جانە وتكەن جىلدىڭ قورىتىندىلارى» تاقىرىبىندا باسپا ءسوز كونفەرەنسياسى ءوتتى. قالاداعى ءبىلىم بەرۋ مەن دەنساۋلىق ساقتاۋ سالاسىنداعى سيفرلىق ترانسفورماسيانىڭ نەگىزگى باعىتتارى تۋرالى الماتى قالاسى سيفرلاندىرۋ باسقارماسى باسشىسىنىڭ ورىنباسارى مەيرام دۇيسەكوۆ باياندادى.
ونىڭ ايتۋىنشا، ءبىلىم بەرۋ سالاسىنداعى سيفرلاندىرۋ ەڭ الدىمەن وقۋشىلار مەن ولاردىڭ اتا-انالارى ءۇشىن قىزمەتتەردىڭ قولجەتىمدىلىگى مەن ساپاسىن ارتتىرۋعا باعىتتالعان. سيفرلىق ەكونوميكاعا قاجەتتى كادرلاردى دايارلاۋ اياسىندا قالادا اۋقىمدى ىرىكتەۋ جۇرگىزىلدى: 10 مىڭ ۇمىتكەردىڭ ىشىنەن 1،5 مىڭ دارىندى وقۋشى تاڭدالىپ، ولار جاساندى ينتەللەكت باعىتىنداعى باعدارلامالار بويىنشا ءبىلىم الادى.
سونىمەن قاتار، ءبىلىم بەرۋ جۇيەسىندە مىڭعا جۋىق وقۋشىنى Junior-رازرابوچيك دەڭگەيىنە دەيىن دايارلاۋ مىندەتى قويىلعان. بۇل جاسوسپىرىمدەرگە مەكتەپ بىتىرمەي تۇرىپ-اق IT سالاسىندا العاشقى پراكتيكالىق داعدىنى مەڭگەرۋگە مۇمكىندىك بەرەدى. ال جاقىندا مەكتەپ ۇيىرمەلەرىنە قاتىسۋعا بەرىلەتىن سيفرلىق وتىنىمدەردىڭ ۇلەسى 90%-عا جەتپەك.
«ءبىز بالالاردىڭ زاماناۋي تەحنولوگيا مەن سۇرانىسقا يە بىلىمگە ناقتى قول جەتكىزۋىنە مۇمكىندىك بەرەتىن جۇيە قالىپتاستىرىپ جاتىرمىز. ءبىز ءۇشىن سيفرلىق شەشىمدەردى جاي عانا ەنگىزۋ ەمەس، وقۋشىلارعا دامۋعا جانە بولاشاق ماماندىعىن تاڭداۋعا كومەكتەسەتىن تۇسىنىكتى ءارى پايدالى قۇرال ۇسىنۋ ماڭىزدى»، — دەدى مەيرام دۇيسەكوۆ.
ايتارلىقتاي وزگەرىستەر دەنساۋلىق ساقتاۋ سالاسىندا دا كۇتىلىپ وتىر. 2026-2027 جىلدارى الماتىدا بارلىق دياگنوستيكالىق زەرتتەۋدى — رەنتگەن، كت، مرت جانە وزگە دە تۇسىرىلىمدەردى ءبىرتۇتاس سيفرلىق ارحيۆكە بىرىكتىرەتىن PACS جۇيەسىن ەنگىزۋ جوسپارلانعان. بۇل دارىگەرلەرگە پاسيەنتتەردىڭ مەديسينالىق دەرەكتەرىنە جەدەل قول جەتكىزۋگە، دياگنوز قويۋ دالدىگىن ارتتىرۋعا جانە تەكسەرۋ ناتيجەلەرىن كۇتۋ ۋاقىتىن قىسقارتۋعا مۇمكىندىك بەرەدى.
سونىمەن قاتار، 2027 جىلعا قاراي قالا تۇرعىندارىنىڭ كەمىندە 70%-ى ەلەكتروندى جەكە دەنساۋلىق كابينەتتەرىن بەلسەندى پايدالانادى دەپ بولجانىپ وتىر. بۇل كابينەتتەر ارقىلى الماتىلىقتار مەديسينالىق اقپاراتتى، تالداۋ ناتيجەلەرىن جانە دارىگەرلەردىڭ ۇسىنىمدارىن ىڭعايلى ونلاين فورماتتا الا الادى.
«سيفرلىق مەديسينا — بۇل ەڭ الدىمەن پاسيەنتتەر ءۇشىن قولايلىلىق پەن ۋاقىت ۇنەمدەۋ. ەلەكتروندى دەنساۋلىق كابينەتتەرى ادامنىڭ جاعدايىن جاقسىراق باقىلاۋىنا جانە دەر كەزىندە كومەككە جۇگىنۋىنە مۇمكىندىك بەرەدى»، — دەدى سيفرلاندىرۋ باسقارماسى باسشىسىنىڭ ورىنباسارى.
سونداي-اق، اناليتيكا مەن دەرەكتەردى باسقارۋعا ەرەكشە كوڭىل ءبولىنىپ وتىر. قالانىڭ احۋالدىق ورتالىعىندا ءبىلىم بەرۋ جانە مەديسينا نىساندارىنا قاتىستى گيس-دەرەكتەر بەلسەندى پايدالانىلادى. اناليتيكالىق قۇرالدار ينفراقۇرىلىممەن قامتىلۋ دەڭگەيىن، ونىڭ ىشىندە مۇمكىندىگى شەكتەۋلى ازاماتتار ءۇشىن مەكتەپتەر مەن مەديسينالىق مەكەمەلەردىڭ قولجەتىمدىلىگىن باقىلاۋعا مۇمكىندىك بەرەدى. بۇل ءوز كەزەگىندە نەعۇرلىم ءدال ءارى نەگىزدەلگەن باسقارۋشىلىق شەشىمدەر قابىلداۋعا جول اشادى.
باسپا ءسوز كونفەرەنسياسىندا ايتىلعانداي، الماتىداعى سيفرلاندىرۋ — بۇل جەكەلەگەن سەرۆيستى ەنگىزۋمەن شەكتەلمەيتىن، تەحنولوگيانى قالا تۇرعىندارىنىڭ تۇرمىس دەڭگەيىن ارتتىرۋعا باعىتتايتىن كەشەندى دامۋ ءتاسىلى.