قالالىق كارديولوگيا ورتالىعىندا «سوزىلمالى جۇرەك جەتكىلىكسىزدىگىن ەمدەۋدىڭ زاماناۋي ستاندارتتارى جانە ستاسيونارلىق-امبۋلاتوريالىق كومەكتىڭ ساباقتاستىعى» تاقىرىبىندا كارديولوگتار، تەراپيەۆتەر جانە جالپى پراكتيكا دارىگەرلەرىنە ارنالعان دوڭگەلەك ۇستەل ءوتتى.
جيىنعا قاتىسۋشىلارعا الماتى قالاسى قوعامدىق دەنساۋلىق ساقتاۋ باسقارماسىنىڭ باس شتاتتان تىس كارديولوگى، قالالىق كارديولوگيا ورتالىعى ديرەكتورىنىڭ ورىنباسارى ارگۇل رازبەكوۆا الماتىداعى قان اينالىمى جۇيەسى اۋرۋلارىنا قاتىستى وزەكتى ستاتيستيكالىق دەرەكتەردى ۇسىندى. كەزدەسۋ بارىسىندا سوزىلمالى جۇرەك جەتكىلىكسىزدىگى (سجج) كابينەتتەرىنىڭ جۇمىسى، تكا-ورتالىقتارىنىڭ قىزمەتى، سونداي-اق پاسيەنتتەرگە مەديسينالىق كومەك كورسەتۋگە قاتىستى نەگىزگى ۇيىمداستىرۋشىلىق جانە پروبلەمالىق ماسەلەلەر تالقىلاندى.
بولەك ءبولىم سجج-نى ەمدەۋدىڭ زاماناۋي تاسىلدەرىنە ارنالدى: مەديكامەنتوزدى تەراپيانىڭ ەرەكشەلىكتەرى، كۆادروتەراپيا پرينسيپتەرى جانە قولدانىستاعى حالىقارالىق ستاندارتتار قاراستىرىلدى. سونىمەن قاتار، ماماندار حيرۋرگيالىق ەمدەۋ ادىستەرىن، ونىڭ ىشىندە ورتالىقتا سوڭعى ەكى جىل بويى ءساتتى قولدانىلىپ كەلە جاتقان سول جاق قارىنشانىڭ جاساندى قۇرىلعىسىن (LVAD) يمپلانتاسيالاۋدى تالقىلادى. مۇنداي وتالار بۇگىندە تەك ۇلتتىق ورتالىقتاردا عانا ەمەس، قالالىق دەڭگەيدە دە ورىندالاتىنى اتاپ ءوتىلدى. ورتالىقتا جۇرەك ترانسپلانتاسياسىمەن قاتار LVAD يمپلانتاسياسى دا جۇرگىزىلەدى، ال بارلىق پاسيەنتتەر تۇراقتى ديناميكالىق باقىلاۋدا بولادى.
كەزدەسۋگە ستاسيونار دارىگەرلەرى جانە پمسپ ۇيىمدارىنىڭ ماماندارى قاتىستى.
«پاسيەنتتەردى مارشرۋتيزاسيالاۋ، كومەك دەڭگەيلەرى اراسىنداعى ساباقتاستىق جانە ماماندار اراسىنداعى كوممۋنيكاسيانى جاقسارتۋ ماسەلەلەرى تالقىلاندى. سونداي-اق سجج بار پاسيەنتتەردى قاشىقتان باقىلاۋعا ارنالعان «اماندىق» ءموبيلدى قوسىمشاسى تانىستىرىلدى. مەديسينالىق قىزمەتكەرلەرگە پاسيەنتتەردى جۇرگىزۋگە ارنالعان ءتيىستى مودۋلگە قولجەتىمدىلىك بەرىلدى»، — دەپ اتاپ ءوتتى ارگۇل رازبەكوۆا.
ورتالىقتا ءار ءتۇرلى دەڭگەيدەگى مامانداردى بىرىكتىرۋ، تاجىريبە الماسۋ جانە جۇرەك-قان تامىرلارى اۋرۋلارى بار ناۋقاستارعا كومەك كورسەتۋ جۇيەسىن جەتىلدىرۋ ءۇشىن اي سايىن وسىنداي دوڭگەلەك ۇستەلدەر وتكىزۋ جوسپارلانۋدا.