ماڭعىستاۋ وبلىسىندا پوليسيا ەكى ستالكينگ دەرەگى بويىنشا سوتقا دەيىنگى تەرگەپ-تەكسەرۋ ءىسىن جۇرگىزىپ جاتىر. ەكى جابىرلەنۋشى دە بۇرىن تانىس بولعان ادامداردىڭ قۋدالاۋىنا شاعىمدانعان، دەپ حابارلايدى Aqshamnews.kz ءتىلشىسى Polisia.kz-كە سىلتەمە جاساپ.
ءبىرىنشى جاعداي بويىنشا 1987 جىلى تۋعان ايەل 13 قاڭتاردا «ە-وتىنىش» جۇيەسى ارقىلى پوليسياعا جۇگىنگەن. ول 2022 جىلدىڭ جەلتوقسانىنان بەرى ءبىر ەر اداممەن قارىم-قاتىناستا بولعانىن، ءبىراق 2025 جىلى بايلانىسىن ۇزگەنىن ايتقان. سوعان قاراماستان، ەر ادام ونى باقىلاپ، ىزىنە ءتۇسۋدى توقتاتپاعان.
پوليسيا مالىمەتىنشە، بۇل جابىرلەنۋشىنىڭ العاشقى ارىزى ەمەس. كۇدىكتى 2025 جىلدىڭ ساۋىرىندە ۇساق بۇزاقىلىق ءۇشىن ايىپپۇل تولەگەن، ال مامىردا وتباسىلىق-تۇرمىستىق قاتىناستارعا بايلانىستى قۇقىقبۇزۋشىلىق ءۇشىن 15 تاۋلىككە قاماۋعا الىنعان. بەينەجازبالار قۋدالاۋ فاكتىلەرىن وتكەن جىلدىڭ شىلدەسىنە دەيىن راستايدى. اتالعان دەرەك بويىنشا ءىس تىركەلىپ، تەرگەۋ باستالعان.
ەكىنشى دەرەك 3 اقپاندا تىركەلگەن. ماڭعىستاۋ تۇرعىنىنىڭ ايتۋىنشا، بۇرىنعى تانىسى ونى 2024 جىلدىڭ قازانىنان بەرى مازالاپ كەلەدى: ءارتۇرلى نومىرلەردەن شامامەن 300 رەت قوڭىراۋ شالعان، ۇيىنە، جۇمىسىنا جانە اقتاۋداعى دەمالىس ورىندارىنا دەيىن كەلىپ، سوڭىنان قالماعان.
تەرگەۋ بارىسىندا كۇدىكتىگە قاتىستى قورعاۋ نۇسقاماسى شىعارىلىپ، پروفيلاكتيكالىق ەسەپكە قويىلعانى انىقتالعان. الايدا ول تالاپتى ساقتاماي، ارەكەتىن جالعاستىرعان. سونىڭ سالدارىنان قورعاۋ نۇسقاماسىن بۇزعانى ءۇشىن اكىمشىلىك حاتتاما تولتىرىلىپ، ازامات اقتاۋ قالالىق پوليسيا باسقارماسىنىڭ ۋاقىتشا ۇستاۋ يزولياتورىنا قامالعان.