الماتىدا نەگىزگى كوشەلەر مەن ساياباقتار كەزەڭ-كەزەڭىمەن جاڭارتىلادى. قالا اكىمىنىڭ ورىنباسارى الماسحان سماتلايەۆ وڭىرلىك كوممۋنيكاسيالار قىزمەتىندە وتكەن بريفينگتە وسىلاي دەدى. بۇل جولعى اڭگىمە «ءبىز – الماتى» باعدارلاماسى اياسىندا كوشە-جول جەلىسى مەن قوعامدىق كەڭىستىكتى كەڭىنەن جاڭعىرتۋ جايلى بولدى.
الماسحان سماتلايەۆتىڭ ايتۋىنشا، قالا اكىمدىگىندە كولىك پەن جاياۋ جۇرگىنشىلەردىڭ جۇكتەمەسى جوعارى كوشەلەر بويىنشا جوبالاۋ-سمەتالىق قۇجاتتاما كەزەڭ-كەزەڭىمەن ازىرلەنىپ جاتىر. نەگىزگى ماقسات — قالالىق ورتانىڭ قاۋىپسىزدىگىن ارتىرىپ، ونى بارىنشا قولايلى ەتە ءتۇسۋ.
«ءار جوبانى قوزعالىس قاۋىپسىزدىگى، تروتۋاردى ىڭعايلى ەتۋ، كوگالداندىرۋ، جارىقتاندىرۋ، قوعامدىق كولىككە باسىمدىق بەرۋ مەن ۆەلوينفراقۇرىلىمدى دامىتۋ جاعىنان جان-جاقتى قاراستىرامىز»، - دەيدى اكىمنىڭ ورىنباسارى.
2026 جىلعى ناۋرىز ايىندا نەگىزگى جولدار مەن قوعامدىق اۋماقتاردىڭ ءبىرازى، ونىڭ ىشىندە ءىرى كوشەلەر، بۋلۆارلار مەن ساياباقتاردا جوبالاردى ىسكە اسىرا باستاۋدى جوسپارلاپ قويعان. 2027 جىلى بۇل جۇمىستار قالانىڭ ورتالىق جانە شەتكى اۋداندارىن قامتىپ، باسقا جەردە دە جالعاسپاق.
الماسحان سماتلايەۆ بارلىق جوبالار قوعامدىق كەڭىستىكتەردىڭ بۇكىل ومىرلىك سيكلىن — جوبالاۋدان باستاپ پايدالانۋ كەزەڭىنە دەيىن قامتيتىن كەشەندى اباتتاندىرۋدىڭ ءبىرىڭعاي ستاندارتى اياسىندا ازىرلەنەتىنىن اتاپ ءوتتى.
«بۇرىن ءار نىساندى ءارتۇرلى قاعيدانى نەگىزگە الىپ جاسايتىن. ءقازىر وسىدان باس تارتتىق. ەندى بارىندە ورتاق ادىستەمەلىك قۇجات بولادى»، - دەدى ول.
باعدارلاما اياسىندا ونداعان كوشە مەن بىرنەشە جاسىل ايماقتى جاڭا ستاندارتقا سايكەستەندىرۋ جوسپارلانىپ وتىر. ءسويتىپ، كەدەرگىسىز ورتا قالىپتاستىرىپ، جاسىل جەلەكتەردى قورعاپ، اۆتوماتتاندىرىلعان سۋارۋ جۇيەسىن ەنگىزىپ، ءبىرىڭعاي جارىقتاندىرۋ جۇيەسى مەن ينجەنەرلىك جەلىلەردى جەر استىنا كوشىرۋ كوزدەلىپ وتىر.
سپيكەردىڭ ايتۋىنشا، مۇنداي ءتاسىل قالالىق ورتانىڭ ساپاسىن ارتتىرىپ قانا قويماي، ۇزاق ۋاقىت بويى پايدالانۋ شىعىنىن ازايتۋعا مۇمكىندىك بەرەدى.