قازاقستان حالىق پارتياسىنىڭ پارلامەنتتىك فراكسياسى «جاڭا كونستيتۋسيا: قازاقستاننىڭ بۇگىنى مەن بولاشاعىنىڭ جاڭا بەينەسى» تاقىرىبىندا كەڭەيتىلگەن وتىرىس وتكىزدى. جيىنعا سەنات پەن ءماجىلىس دەپۋتاتتارى، مەملەكەتتىك ورگانداردىڭ قىزمەتكەرلەرى، سونداي-اق ساراپتامالىق قوعامداستىق وكىلدەرى قاتىستى.
وتىرىستى اشقان ءىس-شارانىڭ مودەراتورى، قحپ پارلامەنتتىك فراكسياسىنىڭ جەتەكشىسى، زاڭناما جانە سوت-قۇقىقتىق رەفورما كوميتەتىنىڭ حاتشىسى، كونستيتۋسيالىق رەفورما جونىندەگى كوميسسيانىڭ مۇشەسى، دەپۋتات ماگەررام ماگەرراموۆ ق ر پرەزيدەنتى قاسىم-جومارت توقايەۆتىڭ باستامالارى ەلىمىزدى جاڭا كونستيتۋسيا جوباسىن ازىرلەۋگە كەزەڭ-كەزەڭىمەن الىپ كەلگەنىن ەسكە سالدى.
– جوبا ەلىمىزدىڭ مەملەكەتتىك ساياساتىنىڭ جاڭا باعدارىن ايقىندايدى، – دەدى ماجىلىسمەن. – ءبىر پالاتالى قۇرىلتاي قۇرىلادى، جاڭا جوعارى كونسۋلتاتيۆتىك ورگان – حالىق كەڭەسىنە ارنالعان جەكە ءبولىم بولادى، سونداي-اق ۆيسە-پرەزيدەنت ينستيتۋتى ەنگىزىلەدى. مۇنىڭ بارلىعى مەملەكەتتىك بيلىك ارحيتەكتۋراسىنىڭ مۇلدە جاڭا قۇرىلىمىن قالىپتاستىرادى.
قازاقستان حالىق پارتياسى ۇسىنىلىپ وتىرعان كونستيتۋسيا جوباسىن قولدايدى. سپيكەرلەر قۇجاتتىڭ ادامعا باعدارلانعان سيپاتىن بىرنەشە رەت اتاپ ءوتتى: وندا ءومىر ءسۇرۋ قۇقىعىن ابسوليۋتتەندىرۋ، جەكە تۇلعانىڭ قول سۇعىلماۋشىلىعىن جانە سيفرلىق جەكە دەرەكتەردىڭ ساقتالۋىن بەكىتۋ، سونداي-اق ازاماتتاردىڭ ار-نامىسى مەن قادىر-قاسيەتىن جانە ونىڭ الەۋمەتتىك قۇقىعىن، اتاپ ايتقاندا، ەڭبەك ەتۋ قۇقىعىن قورعاۋدى كۇشەيتۋ كوزدەلگەن.
– ءبىزدىڭ پارتيا ادام ەكونوميكالىق كورسەتكىشتەرگە ەمەس، ەكونوميكا ادامعا قىزمەت ەتۋى كەرەك ەكەنىن ۇنەمى ايتىپ كەلەدى، – دەدى قحپ دەپۋتاتى يرينا سميرنوۆا. – ەڭبەك ادامى – بۇل رەسۋرس تا، بىرلىك تە ەمەس، ول – مەملەكەتتىڭ نەگىزى جانە كۇشى.
ق ر ادىلەت ۆيسە-مينيسترى لاۋرا مەرساليموۆا كونستيتۋسيانىڭ جاڭا جوباسى ەل دامۋىنىڭ ناقتى كورىنىسى ەكەنىن ءتۇسىندىردى.
– ازاماتتاردىڭ قۇقىقتارى مەن مىندەتتەرىنە ارنالعان بولىمدە ادامداردىڭ قۇقىعى مەن بوستاندىعىن قورعاۋدى ىسكە اسىرۋ كەپىلدىگىن كۇشەيتۋگە باسىمدىق بەرىلدى، – دەدى ۆيسە-مينيستر. – بۇل ماسەلەدە حالىقارالىق قۇجاتتاردىڭ تالابى تولىق ەسكەرىلگەن.
وتىرىستا سەنات دەپۋتاتى عالياسقار سارىبايەۆ «جاڭا كونستيتۋسيا – ەل دامۋىنىڭ جاڭا كەزەڭى، قوعام سۇرانىسى مەن ۋاقىت تالابى» دەگەن تاقىرىپتا بايانداما جاسادى. ماجىلىسمەن مارات باشيموۆ جاڭا كونستيتۋسيانىڭ قۇقىق قورعاۋ الەۋەتى تۋرالى ءسوز قوزعادى. استانا حالىقارالىق ۋنيۆەرسيتەتى جوعارى قۇقىق مەكتەبىنىڭ پروفەسسورى يسيدور بورچاشۆيلي جاڭا كونستيتۋسيا جوباسىنىڭ ستراتەگيالىق باعىتتارىن تىلگە تيەك ەتتى. ق ر زاڭناما جانە قۇقىقتىق اقپارات ينستيتۋتىنىڭ ديرەكتورى ينديرا اۋباكىروۆا جاڭا كونستيتۋسيا اياسىندا ەلىمىزدە قالىپتاساتىن نەگىزگى قاعيداتتار مەن جالپىۇلتتىق قۇندىلىقتاردى ىلگەرىلەتۋ جونىندەگى ويىن ورتاعا سالدى.
وتىرىستا «اسسامبلەيا جاستارى» رەسپۋبليكالىق قوعامدىق بىرلەستىگىنىڭ ءتوراعاسى تيمۋر جۇمىربايەۆ، «استانا زاڭگەرلەر ليگاسى» زاڭ كونسۋلتانتتارى پالاتاسىنىڭ ءتورايىمى اينۇر اباتوۆا جانە ق ر ءپىب جانىنداعى پارلامەنتاريزم ينستيتۋتى جەكە زاڭناما ورتالىعىنىڭ باسشىسى يۋليا كوستيانايا ءسوز سويلەدى.
جيىندى قورىتىندىلاعاندا ماگەررام ماگەرراموۆ ەل ازاماتتارى جوباعا بەلسەندى قاتىسقانىن اتاپ ءوتتى.
– كونستيتۋسياعا قاتىستى پىكىر بىلدىرمەگەن، بەيجاي قالعان بىردە-بىر ادام جوق، – دەپ قورىتىندىلادى ول. – ۇسىنىلىپ وتىرعان جوبادا اتا زاڭنىڭ ءارپى مەن رۋحىنىڭ تەپە-تەڭدىگى قازىرگى كەزەڭنىڭ شىناي سۇرانىسىنا ساي ساقتالعان.
«ادىلەتتى قازاقستاننىڭ» تالابىنا بەيىمدەلگەن كونستيتۋسيا جوباسى بويىنشا جۇمىس جالعاسادى.